Sot(e enjte), një delegacion i Shteteve të Bashkuara të Amerikës(SHBA), i udhëhequr nga dërguari i posaçëm i Donald Trump, Steve Witkoff, dhe kryediplomati Marco Rubio, do të zhvillojë bisedime të rëndësishme me homologët evropianë në Paris për të diskutuar përpjekjet për t’i dhënë fund luftës në Ukrainë.
Takimi, i cili do të përfshijë gjithashtu Sekretarin e Jashtëm të Mbretërisë së Bashkuar, David Lammy, shënon një angazhim të lartë transatlantik për paqen që nga fillimi i konfliktit.
Këto bisedime janë të një rëndësie të veçantë pasi muajt e fundit qeveria amerikane ka qenë më e kujdesshme në konsulimet me aleatët evropianë. Takimi i sotëm do të shërbejë si një mundësi për të riafirmuar bashkëpunimin dhe për të diskutuar strategjitë për përfundimin e luftës. Witkoff dhe Rubio do të takohen me presidentin francez Emmanuel Macron dhe ekipin e tij për të diskutuar planet e ardhshme.
Departamenti i Shtetit i SHBA-së ka konfirmuar se Witkoff do të raportojë për takimin e tij të mëparshëm me presidentin rus Vladimir Putin, që ndodhi javën e kaluar. Ndërkohë, diplomatët evropianë kanë theksuar se do të kërkojnë nga SHBA të ushtrojnë më shumë presion ndaj Rusisë për të pranuar një armëpushim pa kushte, duke përdorur një strategji më të ashpër ndaj Kremlinit.
“Ne duam që SHBA të përdorin pak më shumë shkop,” tha një zyrtar evropian, duke nënkuptuar nevojën për një qasje më të fortë për të shtyrë Rusinë drejt një marrëveshjeje të paqes.