Europarlamenti kërkon masa më të ashpra kundër duhanit dhe alkoolit, në kuadër të luftës kundër kancerit.
Në një rezolutë të miratuar më 12 nëntor, me 447 vota pro, eurodeputetët kërkojnë rritjen e akcizave për produktet e duhanit dhe nikotinës, përfshirë cigaret elektronike dhe qeskat e nikotinës.
Propozimet përfshijnë edhe paketime të standardizuara, kufizimin e aromave tërheqëse për të rinjtë dhe kontrolle më të rrepta të shitjes.
Për alkoolin kërkohen paralajmërime të detyrueshme shëndetësore, kufizime të reklamimit dhe sponsorizimit, veçanërisht në mjediset ku ekspozohen të miturit.
Eurodeputetët kërkojnë gjithashtu të paktën 2,5 miliardë euro në buxhetin e ardhshëm të BE-së për luftën kundër kancerit.
Bëhet fjalë për propozime të Parlamentit Evropian që synojnë forcimin e politikave parandaluese.

