Një gjykatë në Tunizi ka shpallur dënime të ashpra me burg, që variojnë nga 13 deri në 66 vjet, ndaj dhjetëra liderëve të opozitës, biznesmenëve, avokatëve dhe gazetarëve të profilit të lartë, nën akuza për komplot kundër sigurisë së shtetit dhe pjesëmarrje në një grup terrorist.
Lajmi u bë i ditur të shtunën nga agjencia shtetërore e lajmeve TAP, zhvillim ky i cili ka shkaktuar një valë kritikash të ashpra nga opozita dhe organizatat për të drejtat e njeriut, të cilat e cilësojnë procesin gjyqësor si një farsë politike dhe një shenjë të shtimit të autoritarizmit nën udhëheqjen e presidentit Kais Saied.
Në total, 40 persona janë ndjekur penalisht në këtë çështje, përfshirë emra të njohur të politikës dhe medias tuniziane. Më shumë se 20 prej tyre janë larguar nga vendi që nga momenti i ngritjes së akuzave. Midis të pandehurve që ndodhen në paraburgim që prej vitit 2023 janë figura të njohura si Ghazi Chaouachi, Issam Chebbi, Jaëahar Ben Mbrak, Abdelhamid Jlassi, Ridha Belhaj dhe Khyam Turki.
“Në tërë jetën time nuk kam qenë dëshmitar i një gjyqi si ky. Është një farsë. Vendimet janë të parapërgatitura dhe ajo që po ndodh është skandaloze dhe e turpshme,” u shpreh avokati i të pandehurve, Ahmed Souab, pak para dhënies së vendimit.
Autoritetet tuniziane pretendojnë se të akuzuarit, përfshirë edhe ish-zyrtarë të lartë si ish-kreu i inteligjencës Kamel Guizani, kanë komplotuar për të destabilizuar vendin dhe për të rrëzuar regjimin aktual.
Por opozita e hedh poshtë këtë version, duke e konsideruar një përndjekje politike të orkestruar nga Presidenti Saied, i cili që nga viti 2021 ka shpërbërë parlamentin dhe ka qeverisur përmes dekreteve, ndërsa në vitin 2022 shpërndau edhe Këshillin e Lartë Gjyqësor, institucionin që garantonte pavarësinë e drejtësisë.
“Ky regjim autoritar nuk ka asgjë për t’u ofruar tunizianëve përveç më shumë shtypje,” deklaroi Hamma Hammami, lider i Partisë së Punëtorëve, një nga forcat kryesore të opozitës.
Presidenti Saied ka mohuar akuzat për autoritarizëm, duke thënë se veprimet e tij synojnë të luftojnë kaosin dhe korrupsionin e përhapur brenda elitës politike të vendit.