Një shqiptar me origjinë nga Kosova është kthyer në protagonist të një historie emocionuese në Gjermani. Liriton Mavraj ndërhyri për të shpëtuar një vajzë vetëm 3 vjeçe që po mbytej në një pishinë në Aschaffenburg.
Gjithçka ndodhi brenda pak çastesh. Pasi bashkëshortja e tij vuri re vogëlushen në ujë dhe kërkoi ndihmë, Liritoni reagoi menjëherë. Së bashku me rojen e pishinës, ai nisi manovrat e ndihmës së parë dhe frymëmarrjen artificiale.
Pas rreth 30 sekondash ankthi, vogëlushja nisi të merrte frymë, hapi sytë dhe kolliti. Ajo u dërgua më pas në spital, ku, sipas raportimeve të cituara, u konfirmua se ishte jashtë rrezikut për jetën.
Një ndërhyrje në momentin e duhur që bëri diferencën mes jetës dhe tragjedisë. (Revista Ora)