20-vjeçari me origjinë nga Bardhi i Madh po zhvillon një angazhim politik në Bruksel, duke sjellë në vëmendje edhe perspektivën e të rinjve të Kosovës – https://www.albinfo.ch/adrian-simnica-perfaqeson-rinine-shqiptare-ne-parlamentin-evropian/
Vetëm 20 vjeç, i lindur dhe i rritur në Gjermani, por me origjinë nga Kosova, Adrian Simnica po zhvillon një angazhim politik në Parlamentin Evropian në Bruksel, transmeton albinfo.ch.
Simnica, me prejardhje nga Bardhi i Madh i Fushë Kosovës, po qëndron për katër ditë në institucionet evropiane, ku po përfaqëson angazhimin e tij në Junge Union/CDU, Schüler Union Rhein-Sieg dhe strukturat lokale të integrimit në Siegburg.
Gjatë qëndrimit në Bruksel, Simnica ka vënë në fokus edhe prejardhjen e tij nga Kosova, duke theksuar rëndësinë e perspektivës së të rinjve, mundësive për ta dhe të ardhmes evropiane të vendit.
Për 20-vjeçarin, angazhimi politik nuk është vetëm një aktivitet personal, por edhe mundësi për të përcjellë zërin e një brezi të ri të diasporës shqiptare, i cili është rritur në Gjermani, por vazhdon të ruajë lidhjet me vendin e origjinës.
Pas angazhimit të tij edhe në Parlamentin Gjerman, Simnica po e vazhdon aktivitetin politik në nivel evropian, me synimin për të krijuar ura bashkëpunimi ndërmjet Gjermanisë, Kosovës dhe institucioneve evropiane.
Nga Siegburgu në Berlin e tash në Bruksel, Simnica po e shndërron prejardhjen e tij në një motivim për angazhim publik, duke synuar që zëri i të rinjve shqiptarë të diasporës të jetë pjesë e diskutimeve për të ardhmen evropiane./Albinfo.ch