Duhanpirja nuk dëmton vetëm shëndetin fizik, por mund të lidhet edhe me rritjen e ndjenjës së vetmisë, sugjeron një studim i ri i prezantuar në Kongresin e Shoqatës Evropiane të Sëmundjeve të Frymëmarrjes në Barcelonë, ka shkruar The New York Post. Studiuesit analizuan të dhënat e më shumë se 50 mijë personave në Evropë dhe zbuluan se duhanpirësit aktualë ndiheshin më të vetmuar se personat që nuk pinin duhan, pavarësisht moshës apo gjinisë.
Madje, me kalimin e kohës, duhanpirësit përjetonin edhe rritje më të madhe të ndjenjës së vetmisë. “Duhanpirja lidhet me rritjen e vetmisë te të moshuarit, duke sugjeruar se ajo mund të dëmtojë shëndetin psikosocial, përveç pasojave fizike”, ka thënë doktori Keir Philip, i cili prezantoi studimin.
Studiuesit pranojnë se mund të ketë disa arsye për këtë lidhje. Kufizimet dhe ndalimet e duhanpirjes në ambiente të ndryshme mund t’ua vështirësojnë duhanpirësve pjesëmarrjen në aktivitete sociale. Megjithatë, studimi sugjeron se ideja se “duhanpirja është sociale” duhet parë me më shumë skepticizëm.
Vetmia e zgjatur është lidhur më herët me probleme të ndryshme shëndetësore, përfshirë ankthin, depresionin dhe sëmundjet kardiovaskulare. “Këto gjetje tregojnë se, përveç dëmtimit të shëndetit fizik, duhanpirja duket se dëmton edhe aspekte të shëndetit psikosocial. Ideja se duhanpirja mund të jetë ‘sociale’ duhet sfiduar, pasi provat tregojnë të kundërtën”, ka thënë Profesori Des Cox, nga Shoqata Evropiane e Sëmundjeve të Frymëmarrjes.