Ministri në detyrë i Punëve të Brendshme, Xhelal Sveçla, është dënuar me një vit burgim me kusht për hedhjen e gazit lotsjellës në Kuvend më 2018. Pra ai nuk do të vuajë burgimin, po që se brenda një viti nuk kryen tjetër vepër penale.
Sveçla është dënuar nga Gjykata Themelore në Prishtinë për veprën penale “përdorim i armës apo mjetit të rrezikshëm”.
Sveçla nuk qe i pranishëm në momentin e shqiptimit të dënimit.
Më herët, Sveçla ishte deklaruar i pafajshëm dhe hedhjen e gazit e pati quajtur aktivitet politik, përmes të cilit si deputet opozitar në atë kohë, e kundërshtonte ratifikimin e marrëveshjes së demarkacionit me Malin e Zi.
Bashkë me Sveçlën të akuzuar janë edhe ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ish-deputeti i Vetëvendosjes, Salih Zyba dhe ish-deputetja e Lidhjes Demokratike të Kosovës, Drita Millaku.