Një analizë e të dhënave nga mbi 2 mijë persona tregon se njerëzit shqiptojnë çdo vit qindra fjalë më pak se më parë
Njerëzit po flasin gjithnjë e më pak. Ky është përfundimi i një studimi të ri të psikologëve, i cili tregon se numri i fjalëve që shqiptojmë çdo ditë ka rënë ndjeshëm gjatë dy dekadave të fundit. Studimi analizoi regjistrime audio të më shumë se 2 mijë personave, të moshës nga 10 deri në 94 vjeç, të mbledhura në periudhën 2005-2019. Sipas rezultateve, një person përdor mesatarisht 12 mijë e 700 fjalë në ditë, rreth 20 për qind më pak krahasuar me studimet e mëparshme, kur mesatarja ishte rreth 16 mijë fjalë. Studiuesit llogaritën se numri i fjalëve të folura bie mesatarisht me 338 fjalë në vit, ndërsa te personat nën moshën 25 vjeç rënia është edhe më e madhe, duke arritur në 451 fjalë në vit.
“Menduam se kishim bërë një gabim”, tha Matthias Mehl, psikolog social në Universitetin e Arizonës dhe një nga autorët e studimit, pasi rezultatet treguan një rënie të vazhdueshme të komunikimit verbal.
Shkencëtarët besojnë se një nga arsyet kryesore është zëvendësimi i bisedave ballë për ballë me komunikimin digjital. Mesazhet, rrjetet sociale dhe aplikacionet e komunikimit kanë reduktuar shumë nga ndërveprimet e përditshme që dikur ishin të zakonshme. Sipas autorëve, njerëzit nuk kërkojnë më udhëzime nga kalimtarët, përdorin kasa automatike në dyqane dhe flasin më pak me fqinjët apo të panjohurit. Ekspertët paralajmërojnë se kjo prirje mund të ketë pasoja edhe për mirëqenien psikologjike. Studime të tjera kanë treguar se bisedat spontane me njerëz që nuk i njohim mund të përmirësojnë humorin, të rrisin ndjenjën e kënaqësisë me jetën dhe të krijojnë më shumë besim te të tjerët.
Për të arritur në këto përfundime, studiuesit përdorën një aplikacion që regjistronte automatikisht 30 sekonda audio disa herë në orë, duke krijuar një panoramë të natyrshme të mënyrës se si njerëzit komunikojnë gjatë ditës.
Sipas studiuesve, kjo metodë ofron një pasqyrë më reale të jetës së përditshme sesa pyetësorët, pasi njerëzit shpesh nuk e kujtojnë me saktësi sa dhe me kë kanë folur. Autorët theksojnë se studimi nuk provon drejtpërdrejt pse njerëzit po flasin më pak, por ai evidenton një prirje të qartë që meriton vëmendje, veçanërisht në një kohë kur komunikimi digjital po zë gjithnjë e më shumë vend në jetën e përditshme.