Presidenti Bajram Begaj ka kujtuar sot Shën Nënë Terezën, në Ditën e Shenjtërimit të saj, duke vlerësuar kontributin dhe mesazhin e saj universal të dashurisë, humanizmit dhe shpresës.
Begaj e cilëson Nënë Terezën si “misionaren shqiptare të bamirësisë”, duke theksuar përkushtimin e saj ndaj të varfërve, të pamundurve dhe të sëmurëve.
“Me shërbimin e saj ndaj të varfërve, të pamundurve dhe të sëmurëve, me besimin te Zoti, Shën Nënë Tereza na ndihmoi të shohim madhështinë e dinjitetit të çdo njeriu dhe të besojmë te dashuria, drejtësia dhe shpresa”, shkruan Begaj.
Ai thekson se mesazhi dhe vepra e Nënë Terezës vijojnë të kenë një rëndësi të veçantë edhe sot. Ai nënvizon gjithashtu lidhjen e veçantë të shqiptarëve me figurën e Nënë Terezës, duke e cilësuar atë si një udhëzim për shoqërinë.
“Sot, drita e shpirtit të saj mbetet një burim frymëzimi dhe shërimi për mbarë njerëzimin. Për ne shqiptarët, ajo është një udhëzim dhe një amanet për të qenë pranë atyre që kanë më shumë nevojë”, shkruan Begaj.