Raporton Televizioni News
Një tjetër histori suksesi shqiptar vjen nga Gjermania.
Dr. Bedri Ramadani, me origjinë nga fshati Vaksincë i Kumanovës, ka shënuar një tjetër arritje të rëndësishme në karrierën e tij profesionale, duke qenë pjesë e ekipit të Klinikës Universitare të Düsseldorfit që realizoi me sukses transplantin e 400-të të zemrës.
Ramadani, i cili ka lindur në Vaksincë, prej vitesh ushtron profesionin e kardiokirurgut në Gjermani. Sipas të dhënave të publikuara, gjatë karrierës së tij ai ka marrë pjesë në më shumë se 7 mijë operacione në zemër, ndërsa ka realizuar edhe mbi 80 transplante të zemrës.
Përveç angazhimit të tij profesional, Dr. Bedri Ramadani është i njohur edhe për afërsinë me komunitetin shqiptar në Gjermani, duke ofruar këshilla dhe mbështetje për bashkatdhetarët.
Nga një fshat i Kumanovës deri në një prej klinikave universitare më të njohura në Gjermani, rrugëtimi i Dr. Ramadanit është një histori e punës, profesionalizmit dhe përkushtimit.
Një emër nga Vaksinca që sot po shkruan histori në mjekësinë gjermane.