Një takim i veçantë mes fotografit shqiptar Arbiol Simoni dhe një ushtari italian me origjinë arbëreshe është kthyer në një moment shumë të komentuar në rrjet.
Teksa Simoni po fotografonte disa ushtarë në Itali, një prej tyre iu afrua dhe e përshëndeti në shqip, duke e surprizuar me mënyrën e rrjedhshme të të folurit.
“Unë jam arbëresh. Ti u ke bërë fotografi disa shokëve të mi, a do të na bësh edhe neve të dyve?”, i tha ushtari.
I habitur, Simoni e pyeti se sa vite kishte jetuar në Itali, por përgjigjja e ushtarit ishte edhe më e veçantë:
“Kam lindur këtu, jam arbëresh.”
Ai tregoi se jeton në një fshat arbëresh, ku komuniteti vazhdon të ruajë prej brezash gjuhën, këngët dhe veshjet tradicionale.
“Ne kemi gjuhën tonë, këngët tona dhe veshjet tona”, u shpreh ai, duke treguar krenarinë për prejardhjen e tij.
Takimi u mbyll me një fotografi kujtim mes ushtarit arbëresh, shokëve të tij dhe fotografit shqiptar, në një moment që dëshmon se edhe pas shumë brezash, lidhja me rrënjët shqiptare vazhdon të mbetet e fortë.