Një studim zbuloi se ata që hapën llogari në rrjetet sociale në moshën 10-11 vjeç kishin rezultate më të dobëta në matematikë dhe gjuhë sesa ata që pritën deri në moshën 13-14 vjeç
Fëmijët që fillojnë të përdorin rrjetet sociale që në moshën 10-11 vjeç priren të kenë rezultate më të dobëta në shkollë krahasuar me ata që hapin llogarinë e parë disa vite më vonë. Në këtë përfundim ka arritur një studim i Universitetit Milano-Bicocca, i zhvilluar me 5 mijë e 277 nxënës nga shkolla të Italisë Veriore dhe i publikuar më 3 gusht në revistën shkencore Nature Human Behaviour. Studiuesit krahasuan veçanërisht nxënësit që kishin hapur llogarinë e parë në rrjetet sociale në moshën 10-11 vjeç me ata që kishin pritur deri në moshën 13-14 vjeç.
Rezultatet e tyre në vitet e para të shkollimit ishin thuajse identike. Diferencat nisën të shfaqeshin më vonë. Nxënësit që kishin pasur qasje më herët në rrjetet sociale regjistronin rezultate më të dobëta në matematikë dhe në gjuhën italiane. Diferenca ishte rreth 0.2 devijime standarde në të dyja lëndët.
Sipas kriterit të përdorur në Bashkimin Evropian, ku efekti arsimor i një viti shkollimi llogaritet në rreth 0.4 devijime standarde, diferenca e konstatuar është e barasvlershme me afërsisht gjashtë muaj shkollim më pak. “Nuk është një diferencë e vogël”, shpjegoi Marco Gui, profesor i sociologjisë dhe drejtues i grupit kërkimor. Studiuesit identifikuan si një shpjegim të mundshëm kontrollimin e shpeshtë të telefonit dhe rrjeteve sociale, veçanërisht gjatë kryerjes së detyrave dhe përpara gjumit, çka lidhet me shpërqendrimin dhe mbingarkesën njohëse.
Nxënësit që deklaronin se kontrollonin më shpesh telefonin ishin përgjithësisht edhe ata që kishin filluar më herët përdorimin e rrjeteve sociale dhe që, në moshën 15-16 vjeç, regjistronin rezultate më të ulëta në matematikë dhe italisht. Një rezultat i ndryshëm u konstatua në anglisht, ku nuk kishte diferenca mes dy grupeve. Studiuesit sugjerojnë se sasia e madhe e përmbajtjeve në anglisht në rrjetet sociale mund të rrisë familjaritetin e nxënësve me këtë gjuhë. Studimi zbuloi gjithashtu se hapja e hershme e një llogarie në rrjetet sociale lidhej me probabilitet më të lartë për të përsëritur vitin shkollor dhe me mundësi më të ulët për të marrë nota të shkëlqyera.