Në Samitin e 29-të Kinë-ASEAN në Manila të Filipineve, kryeministri kinez Li Qiang theksoi të hënën që, të mos e shpërqendrojnë fokusin dhe të punojnë së bashku për të ndërtuar një bashkësi më të ngushtë me të ardhme të përbashkët Kinë-ASEAN.
Ai u bëri thirrje të dy palëve të forcojnë themelet për paqen e sigurinë duke i trajtuar si duhet dallimet, nëpërmjet dialogut e konsultimeve, duke kundërshtuar së bashku ndërhyrjen e jashtme dhe duke mbrojtur paqen e qëndrueshmërinë rajonale.
Pekini mirëpret arritjen sa më parë të Kodit të Sjelljes në Detin e Kinës Jugore, i cili do të ofrojë një garanci të fortë institucionale për paqen dhe qëndrueshmërinë afatgjatë në Detin e Kinës Jugore, tha Li.
Ai bëri thirrje gjithashtu për t’i dhënë shtysë zhvillimit e begatisë rajonale, duke theksuar nevojën që të dy palët të shfrytëzojnë hyrjen në fuqi të Protokollit të Përmirësuar 3.0 të Zonës së Tregtisë së Lirë (ZTL) Kinë-ASEAN si një mundësi për të thelluar bashkëpunimin në zinxhirët e industrisë dhe të furnizimit, për të përshpejtuar ndërlidhjen infrastrukturore, ose “ndërlidhjen e fortë”, në fusha si hekurudhat dhe autostradat, si edhe për të forcuar “ndërlidhjen e butë” në mekanizma, standarde e rregulla.
Kryeministri tha se pala kineze e përshëndet krijimin e një mekanizmi Kinë-ASEAN për mbledhjet e ministrave të energjetikës dhe është e gatshme të punojë me ASEAN-in për të organizuar me sukses Vitin e Bashkëpunimit Kinë-ASEAN për inteligjencën artificiale (AI) vitin e ardhshëm, për të nxitur bashkëpunimin “AI+” e për t’i dhënë një shtysë të fortë zhvillimit ekonomik rajonal me cilësi të lartë.
Li gjithashtu bëri thirrje për përmirësimin e mirëqenies së njerëzve, duke shprehur gatishmërinë e palës kineze për të vazhduar kontributin në Fondin e Bashkëpunimit Kinë-ASEAN e për të forcuar bashkëpunimin me ASEAN-in në fusha si pakësimi i varfërisë, parandalimi dhe zbutja e fatkeqësive, siguria ushqimore dhe shëndeti i nënës e fëmijës, për të promovuar zhvillimin e qëndrueshëm të rajonit.

