Autoritetet iraniane kanë ekzekutuar sot tre burra të dënuar për kryerjen e grabitjeve të armatosura, sipas agjencisë së lajmeve Mizan, e cila është e lidhur me sistemin gjyqësor të vendit.
Irani njihet për aplikimin e dënimit me vdekje për një sërë veprash penale dhe, sipas organizatave ndërkombëtare për të drejtat e njeriut, si Amnesty International, renditet i dyti në botë për nga numri i ekzekutimeve, pas Kinës.
“Të tre personat u dënuan me vdekje për kryerjen e grabitjeve të armatosura në Teheran dhe në qytete të tjera të vendit. Ekzekutimi u krye mëngjesin e sotëm,” raportoi Mizan Online.
Sipas drejtësisë iraniane, të dënuarit u shpallën fajtorë për veprën penale të “moharebeh” – që në persisht do të thotë “luftë kundër Zotit” – për shkak të përfshirjes së tyre në 14 grabitje në prill të vitit 2024.
Ekzekutimi u krye me varje.
Po ashtu, në fillim të tetorit, autoritetet iraniane kishin njoftuar për ekzekutimin e gjashtë anëtarëve të një grupi të akuzuar për sulme “terroriste” në provincën e Khuzestanit, në jug të vendit.
/vizionplus.tv