Një studim i ri nga Instituti i Teknologjisë i Masaçusetsit (MIT) ngre shqetësime serioze mbi ndikimin e përdorimit të ChatGPT në aftësitë njohëse dhe procesin e të nxënit. Hulumtimi, i kryer nga MIT Media Lab, tregon se përdorimi ekskluziv i mjetit gjenerues të tekstit mund të shkaktojë rënie të angazhimit mendor, përvetësim të ideve sipërfaqësore dhe një lidhje më të dobët me përmbajtjen e prodhuar.
Studiuesit ndanë pjesëmarrësit në tre grupe: një që përdorte vetëm ChatGPT, një tjetër që përdorte një motor kërkimi dhe një grup kontrolli që nuk përdorte asnjë mjet ndihmës. Përmes monitorimeve me elektroencefalogram (EEG) gjatë procesit të shkrimit, u zbulua se grupi që mbështetej vetëm te ChatGPT shfaqi aktivitetin më të ulët nervor dhe kishte vështirësi të kujtonte apo të njihte shkrimet e veta.
Në një test të dytë, të njëjtit pjesëmarrës iu kërkua të shkruanin pa ndihmën e teknologjisë. Ata që më parë kishin përdorur ChatGPT prodhuan tekste më të dobëta, me ide të njëanshme dhe sipërfaqësore. Ndërkohë, pjesëmarrësit që kishin punuar pa teknologji treguan angazhim më të lartë, si në aspektin kognitiv ashtu edhe në ruajtjen e njohurive.
Studimi paralajmëron për një “borxh njohës” që mund të rezultojë nga përdorimi i vazhdueshëm i modeleve të mëdha gjuhësore (LLM), i cili ndikon negativisht në të menduarit kritik, kreativitetin dhe autonominë mendore. Sipas studiuesve, përdorimi i pandërgjegjshëm i këtyre mjeteve mund të çojë në humbjen e pronësisë intelektuale mbi idetë dhe në adoptimin pasiv të pikëpamjeve të gatshme.
Autorët e studimit theksojnë nevojën për më shumë kërkime mbi efektet neurologjike dhe kognitive të inteligjencës artificiale përpara se përdorimi i saj të konsiderohet në mënyrë të përgjithësuar si pozitiv për zhvillimin njerëzor.