Trajneri i Barcelonës, Hansi Flick, ka shprehur admirim të veçantë për Liverpoolin, duke i cilësuar atë si një nga ekipet më të forta dhe të preferuara të tij për momentin.
Në një konferencë për shtyp, Flick i konsideroi “The Reds” si favoritë për trofeun e këtij sezoni të Champions League.
Liverpool ka dominuar fazën e parë të Champions League këtë sezon, duke siguruar gjashtë fitore nga gjashtë ndeshje dhe duke u pozicionuar në krye të grupit. Performanca e tyre ka tërhequr vëmendjen e shumë ekspertëve dhe trajnerëve, përfshirë Flick-un, i cili u shpreh:
“Kur shikoj Liverpool-in, shoh një ekip me fuqi të jashtëzakonshme. Ata janë një nga ekipet e mia të preferuara në botë për momentin”, tha Flick.
Barcelona, nën drejtimin e Flick, gjithashtu po zhvillon një sezon të ngjeshur, duke konkurruar në tre fronte kryesore: Champions League, La Liga dhe Copa del Rey. Megjithëse renditet e dyta në grupin e Champions League, tre pikë pas Liverpool-it, Flick mbetet optimist për suksesin e skuadrës së tij.
“Ne po bëjmë mirë, por ka skuadra shumë të mira që gjithashtu po shkëlqejnë. Ne po luftojmë për të mbetur konkurrues në të gjitha kompeticionet”, tha Flick.