Nga premtimi për vazhdimin e transportit publik falas te propozimi për bileta më të shtrenjta. Këtë kthesë e kritikoi këshilltari i AKI-së, Huzeir Mustafi, në seancën e 19-të të Këshillit të Komunës së Kumanovës, duke e cilësuar rritjen e propozuar si barrë shtesë për buxhetin e familjeve dhe shkelje të zotimeve zgjedhore. Mustafi tha se vazhdimi i transportit falas kishte qenë pika e parë e platformës zgjedhore të kryetarit aktual. Sipas tij, pas zgjedhjeve kjo masë ishte ndërprerë, ndërsa tani qytetarëve po u kërkohet të paguajnë më shumë për udhëtimin.
“Në vend që qytetarët të shfrytëzojnë një të mirë që u ishte premtuar dhe me të cilën keni marrë vota, sot kemi propozim për rritjen e çmimeve të transportit publik”, deklaroi ai.
Këshilltari i AKI-së vlerësoi se premtimi për transport falas mund të ketë ndikuar në përcaktimin e votuesve, veçanërisht në fshatra. Sipas tij, qytetarët do të kishin gjykuar ndryshe nëse gjatë fushatës do t’u ishte paralajmëruar shtrenjtim i transportit dhe i shërbimeve të tjera komunale. Duke iu drejtuar udhëheqëses së sektorit që prezantonte propozimin, Mustafi kritikoi edhe mungesën e kryetarit në mbrojtjen e vendimeve që, sipas tij, prekin drejtpërdrejt qytetarët. Ai tha se përgjegjësia për t’i shpjeguar këto masa nuk duhet t’u lihet vetëm përfaqësuesve të administratës.
Një pjesë të diskutimit ia kushtoi cilësisë së transportit publik. Mustafi kërkoi të sqarohet se çfarë përmirësimesh ofrohen përballë çmimeve të propozuara, duke thënë se nuk sheh modernizim që do ta arsyetonte barrën shtesë.
“Ne shohim të njëjtët autobusë që vazhdimisht qarkullojnë nëpër rrugët e qytetit. Nuk kemi autobusë të rinj, nuk ka ndonjë standard të ri me të cilin qytetarët ndoshta do ta pranonin këtë vendim. Gjithçka është e vjetër, vetëm çmimet janë të reja”, theksoi ai.
Sipas Mustafit, rritja e tarifave duhet të shoqërohet me arsyetim të qartë për investimet dhe përmirësimin e shërbimit. Ai kundërshtoi që kostoja për qytetarët të shtohet pa ndryshime të dukshme në kushtet e udhëtimit. “Ne nuk e përkrahim këtë propozim, sepse vlerësojmë se vendime të tilla e dëmtojnë rëndë buxhetin familjar të qytetarëve të Kumanovës”, përfundoi këshilltari i AKI-së.