Të nderuar përfaqësues të mediave, të nderuar qytetarë,
Davor Macura i blen aksionet për hyrje në Alta bankë drejtpërdrejt nga krushku i Ali Ahmetit.
Pasi opinioni publik pa se si më 9 qershor 2025 një kompani e lidhur me krushkun e Ali Ahmetit kishte marrë kredi prej 5 milionë eurosh drejtpërdrejt nga selia qendrore e “Alta bankës” në Beograd, ndërsa nga Zajazi vazhdon heshtja, sot publikojmë pjesën e dytë të kësaj skeme milionëshe bankare.
Sot i bëjmë publike faktet se si oligarku kontrovers serb, Davor Macura i cili aktualisht ndodhet në paraburgim në Serbi, mori kontrollin mbi “Stopanska bankën” e Manastirit (e cila më vonë u riemërua në Alta banka Maqedoni), duke i blerë aksionet drejtpërdrejt nga kompania familjare e krushkut të Ali Ahmetit!
Ja se si mbyllet ky rreth financiar skandaloz:
Më herët, në tetor të vitit 2024, kompania e Kërçovës “AS Senjak”, në pronësi të Selahudin Arifit, krushkut të Ali Ahmetit, hyn papritur në biznesin bankar dhe blen një pako të konsiderueshme aksionesh në “Stopanska bankën” e Manastirit.
Në qershor të vitit 2025, kompania e tyre e lidhur merr kredinë prej pesë milionë eurosh nga “Alta banka” në Beograd.
Dhe vetëm tre muaj më vonë, më 17 shtator 2025, ndodh akti përfundimtar: kompania “AS Senjak” e krushkut të Ahmetit zyrtarisht ia shet aksionet e saj në bankën e Manastirit pikërisht Davor Macurës dhe “Alta bankës” së tij, duke i mundësuar kështu marrjen e drejtpërdrejtë të bankës në Maqedoni!
Të nderuar qytetarë, skema në relacionin Zajaz – Kërçovë – Beograd është e qartë si kristali:
Në qershor rrjeti familjar i biznesit të Ahmetit merr kredi prej 5 milionë eurosh nga Macura në Beograd.
Në shtator krushku i Ahmetit përmes “AS Senjak” ia shet aksionet po Macurës për të hyrë në “Alta banka Maqedoni” dhe arkëton miliona!
Prandaj sot shtrojmë drejtpërdrejt këto pyetje:
A e ka financuar Davor Macura hyrjen e tij në tregun e Maqedonisë në fakt me paratë e veta përmes kredisë prej 5 milionë eurosh që në qershor u dha kompanive të lidhura me rrjetin familjar të Ali Ahmetit?
A ishte shitja e aksioneve më 17 shtator 2025 nga krushku i Ahmetit një kompensim i paracaktuar për mbylljen e kredisë milionëshe të qershorit?
Dhe më e rëndësishmja: sa është fitimi neto, diferenca në çmim dhe provizioni që ka mbetur në llogaritë e rrethit familjar të biznesit të Ali Ahmetit dhe nipave të tij, për t’ia kryer këtë punë Davor Macurës në Maqedoni?
Tashmë çdo qytetari i është bërë e qartë pse ish funksionarët e BDI-së, Fatmir Besimi, Bujar Osmani dhe Artan Grubi e shtynë me aq agresivitet hyrjen e “Alta bankës” në sektorin financiar të Maqedonisë. Derisa ata politikisht ia hapnin rrugën në institucionet shtetërore, krushku i Ali Ahmetit ia ruante dhe më pas ia rishiste aksionet Davor Macurës!
Prokuroria publike dhe Drejtoria e inteligjencës financiare nuk kanë më asnjë justifikim për të pritur. Kërkojmë hetim urgjent që do t’i vë në një linjë kredinë prej 5 milionë eurosh të 9 qershorit 2025 dhe shitjen e aksioneve të 17 shtatorit 2025.
Sistemi bankar i Maqedonisë nuk guxon të bëhet pre e oligarkëve rajonal në paraburgim dhe e kartelit familjar të biznesit të Ali Ahmetit.
Koha e pandëshkueshmërisë ka përfunduar dhe për këto transaksione milionëshe duhet të ketë përgjegjësi të plotë financiare dhe penale!
Ju faleminderit.