Deputeti i Lidhjes Demokratike të Kosovës (LDK), Arben Gashi, ka konfirmuar në emisionin “Pressing” të T7 se ka ambicie për të kandiduar për kryetar të partisë.
I pyetur nëse do të jetë kandidat për këtë pozitë, Gashi ka thënë se gjasat janë maksimale që të hyjë në garë, nëse ajo do të jetë e mirëfilltë, e hapur dhe demokratike.
“Gjasat maksimale janë që po, nëse do të kemi një garë të mirëfilltë, të hapur dhe demokratike. Nëse nuk ka konsensus për ndonjë kryetar, hapet gara dhe do të jem kandidat”, ka deklaruar Gashi në “Pressing”.
Ai ka theksuar se, nëse arrihet një konsensus paraprak përmes kompromisit, nuk duhet të ketë qëndrime destruktive, ndërsa në rast se hapet gara për kryetar të LDK-së, ai do të jetë kandidat.
“Nëse do të ketë konsensus paraprak në kompromis, nuk duhet të jemi destruktivë. Nëse hapet gara, do të jem kandidat”, ka thënë Gashi.