Kryeministri shqiptar Edi Rama ka deklaruar se nuk do të japë dorëheqje, pas protestave të dhunshme që kanë përfshirë Tiranën javët e fundit.
Në një intervistë për gazetën e njohur greke “Kathimerini”, Rama thekson se, në demokraci, qeveritë nuk ndryshojnë me dhunë e bombola molotovë, por përmes zgjedhjeve, transmeton Tch.
“Populli shqiptar na dha një mandat të qartë vitin e kaluar dhe unë synoj ta përmbush atë. Çdokush mund të kërkojë dorëheqjen time; kjo është pjesë e jetës demokratike. Askush nuk ka të drejtë ta imponojë atë me dhunë. Detyra ime është të dëgjoj ankesat e arsyeshme, të mbroj të drejtat e qytetarëve dhe të vazhdoj punën për integrimin e Shqipërisë në Bashkimin Evropian. Nuk do të heq dorë nga kjo detyrë vetëm sepse një pakicë mendon se djegia e vendit është rruga më e shkurtër drejt pushtetit”.
Në intervistën për median greke, kreu i qeverisë shqiptare i ndan protestuesit në dy grup, një pjesë që kërkojnë të ardhme më të mirë dhe ata që kryejnë akte dhune, dhe që për kryeministrin, janë individë të lidhur me lëvizjen Antifa.
“Ekziston një vijë e qartë ndarëse midis studentëve që duan një të ardhme më të mirë dhe grupeve të mbuluara me kapuçë, përfshirë njerëz që i kam lidhur me lëvizjen Antifa – të cilët hedhin kokteje molotov, sulmojnë ndërtesa publike dhe dëmtojnë pronën private. Lufta kundër korrupsionit është përgjegjësi e institucioneve të Drejtësisë. Nuk është puna e atyre që përdorin dhunën si mjet për të pretenduar se përfaqësojnë një brez të tërë”.
Shqetësimit të të rinjve për arsimin, koston e jetesës dhe mungesën e mundësive reale, kryeministri Edi Rama i përgjigjet me rritje të buxhetit për vitin 2027, ndërsa shpreh sërish gatishmërinë për dialog, përcjell Klankosova.tv.
“Buxheti i vitit 2027, të cilin do ta paraqesim së shpejti, përfshin masa shtesë për familjet, shërbimet publike dhe studentët. Në të njëjtën kohë, i kam ftuar studentët dhe mësuesit në një dialog të hapur. Jam i gatshëm të shqyrtoj çdo propozim serioz, madje edhe ato që vijnë nga kritikët tanë më të ashpër”.
“Nuk kam pretenduar kurrë se gjithçka në Shqipëri është bërë mirë”, thotë kryeministri Rama në mbyllje, duke shtuar se “Një pakicë beson se djegia e vendit është rruga më e shkurtër drejt pushtetit”.