Presidenti serb Aleksandër Vuçiç e ka cilësuar kryeministrin shqiptar Edi Rama si një politikan “tepër kokë më vete”, i cili, sipas tij, nuk përshtatet lehtësisht me kërkesat e disa fuqive ndërkombëtare. Në një intervistë për televizionin serb Informer, Vuçiç pretendoi se Rama gëzon më shumë preferenca në disa qarqe ndërkombëtare sesa ai vetë, por se qëndrimet e pavarura të kryeministrit shqiptar nuk janë gjithmonë në përputhje me interesat e tyre.
Sipas Vuçiçit, një nga arsyet e presioneve ndaj Ramës ka qenë nisma rajonale “Ballkani i Hapur”, e cila synonte forcimin e bashkëpunimit ekonomik dhe politik mes vendeve të rajonit. Ai pretendoi se disa aktorë të jashtëm nuk dëshironin që vendet e Ballkanit të vendosnin vetë për format e bashkëpunimit.
“Ballkani nuk duhet t’u përkasë popujve të Ballkanit, por disa fuqive të tjera. Edi Rama është tepër kokë më vete për të qenë sipas qejfit të tyre. A e preferojnë atë më shumë se mua? Po, e preferojnë më shumë se mua. Unë veproj krejtësisht sipas mendjes sime, prandaj njerëz si unë nuk i duan aspak. Edhe Ramën, megjithëse e respektojnë, nuk e duan shumë”, deklaroi Vuçiç.
Ai nuk përmendi emra konkretë të fuqive apo qarqeve ndërkombëtare që, sipas tij, kanë kundërshtuar këtë nismë. Ballkani i Hapur u lançua në vitin 2019 nga Rama, Vuçiç dhe ish-kryeministri i Maqedonisë së Veriut, Zoran Zaev, me synimin për të lehtësuar lëvizjen e njerëzve, mallrave, shërbimeve dhe kapitaleve mes vendeve pjesëmarrëse.
Nisma u mbështet nga Shqipëria, Serbia dhe Maqedonia e Veriut, por u kundërshtua nga Kosova, e cila kërkonte që bashkëpunimi rajonal të zhvillohej në kuadër të Procesit të Berlinit. Me kalimin e kohës, Ballkani i Hapur humbi peshën politike, ndërsa Procesi i Berlinit dhe Plani i Rritjes i Bashkimit Europian u konsoliduan si korniza të rëndësishme të bashkëpunimit rajonal.
Në të njëjtën intervistë, Vuçiç komentoi edhe bashkimin e partive shqiptare në Luginën e Preshevës për zgjedhjet parlamentare serbe të 25 tetorit. Për herë të parë, subjektet kryesore politike shqiptare kanë vendosur të garojnë me një listë të përbashkët, të kryesuar nga Shaip Kamberi.
Vuçiç akuzoi kryeministrin e Kosovës, Albin Kurti, dhe aktorë të jashtëm se kanë ndikuar në këtë bashkim, me synimin, sipas tij, për të ndërkombëtarizuar çështjen e Luginës së Preshevës. Ai përdori gjuhë të ashpër ndaj Kamberit dhe përfaqësuesve të tjerë të listës, duke i akuzuar se synojnë të ngrenë çështjen shqiptare në arenën ndërkombëtare.
“Për herë të parë, partitë shqiptare janë bashkuar, sepse i ka bashkuar jo vetëm Kurti, por edhe të tjerë nga jashtë. Për herë të parë, të gjithë garojnë së bashku”, deklaroi Vuçiç, duke pretenduar se bashkimi synon të rrisë presionin ndërkombëtar ndaj Serbisë.
Ai përmendi edhe kongresmenin amerikan Joe Wilson, të cilin e akuzoi për lobim në favor të interesave shqiptare. Vuçiç e cilësoi atë “mercenar” dhe pretendoi se përmes tij dhe aktorëve të tjerë në Europë do të tentohet të vihet në qendër të vëmendjes çështja e Luginës së Preshevës. Këto akuza u paraqitën nga Vuçiç gjatë intervistës, pa u shoqëruar në materialin e publikuar me prova që t’i vërtetojnë.
Kreu i shtetit serb tha gjithashtu se përpjekjet e Beogradit për investime dhe bashkëpunim me pushtetin vendor në zonat e banuara nga shqiptarët nuk kanë arritur, sipas tij, të shmangin ndërhyrjen e faktorëve të jashtëm. Ai paralajmëroi se Serbia nuk do të lejojë atë që e konsideron presion ndaj saj përmes çështjes së Luginës së Preshevës.
Deklaratat e Vuçiçit vijnë në një moment kur partitë shqiptare në Luginë synojnë të rrisin përfaqësimin e tyre parlamentar përmes një liste të përbashkët, ndërsa marrëdhëniet mes Beogradit dhe Prishtinës, si dhe debatet për të drejtat e shqiptarëve në jug të Serbisë, mbeten çështje të ndjeshme politike në rajon.