Pseudo-patriotizmi dhe folklorizmi politik nuk e zhbëjnë këtë Gjykatë
Shkruan:Imrane R. Morina
As referendumet, as protestat, as deklaratat politike dhe as presioni në rrugë nuk e zëvendësojnë procedurën kushtetuese.
E as Presidenti, as Kuvendi, i marrë veçmas, nuk mund ta zhbëjnë këtë mekanizëm jashtë procedurave të përcaktuara me Kushtetutë dhe ligj.
E aq më pak figura politike sepse atëherë vetëm se vërtetojmë se duhej gjykatë nga jashtë sepse ne ndërhyjmë në gjykime dhe nuk dijmë të bëjmë drejtësi.
E, pa dashur të jem e vrazhdë: kjo çështje përveç 2/3 e votave kërkon edhe votat e komuniteteve joshumicë, 2/3 e deputëve serbë, sepse kërkohet shumica e dyfishtë kushtetuese.
E që, shkurt e shqip, i bie që ky proces më së shumti është në duart e Listës Serbe.
Prandaj, në vend që t’i ushqejmë qytetarët me iluzione politike, duhet t’u themi të vërtetën: kjo nuk zgjidhet me britma, folklorizëm apo populizëm.
Zgjidhet me institucione, ligj dhe diplomaci.
Duhet të përdoren të gjitha rrugët juridike në dispozicion, përfshirë mjetet juridike të parashikuara, aty ku lejohet.
Por një përgjegjësi të veçantë e kanë edhe ata që dikur, me aq ngulm, kërkuan dhe votuan për krijimin e këtyre Dhomave.
Sot nuk mjafton të distancohen nga pasojat e vendimeve të tyre. Duhet të pranojnë përgjegjësinë politike, të kërkojnë falje për një vendim që sot po prodhon pasoja kaq të rënda dhe të angazhohen institucionalisht për mbrojtjen e të drejtave të krerëve të UÇK-së.
Nëse vërtet e duan UÇK-në dhe Kosovën, sot duhet të jenë pjesë e zgjidhjes, jo vetëm e reagimit politik.
Duke mos humbur kohë, por duke qenë promotore kryesore në ankim në kohën e duhur, sepse edhe ankesa s’ka efekt pas afatit.
Kosova duhet të krijojë dhe funksionalizojë institucionet e saj.
Duhet të ketë President, Kuvend dhe Qeveri funksionale që të mund të veprojnë me përgjegjësi juridike, institucionale dhe diplomatike.
Sepse vetëm një bashkëpunim cilësor i brendshëm mund të sjellë rezultatin e duhur, pa i marrë me akuza të ndërsjella dhe kritika.
E mbi të gjitha, duhet të përdorim çdo rrugë që lejon ligji për të kërkuar drejtësi dhe për të mbrojtur të drejtat e atyre që sot ndodhen përballë këtij vendimi.
Dhe për fund: ndoshta gjykimi duket politik, por zgjidhja kërkon vetëm veprim procedural, juridik dhe institucional.
Prandaj, veproni në të mirë të Kosovës, të popullit të saj dhe të krerëve të Ushtrisë që ndihmuan në formësimin e këtij shteti.
Kosova nuk mbrohet duke bërtitur kush më fort.
Por duke funksionuar më mirë si shtet.