Një tragjedi e rëndë ka ndodhur në Jacksonville të SHBA-së, ku një familje me origjinë nga Lushnja është përfshirë nga një zjarr në banesën e saj.
Tre fëmijë humbën jetën në flakët që përfshinë banesën në orët e para të mëngjesit të së mërkurës, ndërsa dy prindërit dhe dy fëmijë të tjerë ndodhen në spital në gjendje kritike.
Sipas autoriteteve lokale, alarmi për zjarrin u dha rreth orës 05:13, në zonën e Windergate Drive, pranë Old St. Augustine Road. Ekipet zjarrfikëse mbërritën rreth katër minuta më vonë dhe gjetën flakë të mëdha në katin e parë të banesës, ndërsa kati i dytë ishte përfshirë nga tymi i dendur.
Shefi i zjarrfikësve të Jacksonville, Percy Golden, tha se dy të rritur dhe dy fëmijë kishin mundur të dilnin nga banesa përpara mbërritjes së ekipeve të emergjencës.
Një fqinj ka treguar një moment dramatik të ngjarjes, duke thënë se një foshnjë dhe një i rritur u hodhën nga dritarja e katit të dytë, ku u kapën nga persona që ndodheshin jashtë.
Pavarësisht ndërhyrjes së zjarrfikësve, brenda banesës u gjetën tre fëmijë pa shenja jete. Flakët u vunë nën kontroll rreth orës 05:38.
Viktimat dhe të mbijetuarit u transportuan menjëherë në spital, ndërsa ekipet e Kryqit të Kuq janë angazhuar për të ndihmuar familjarët dhe personat e zhvendosur nga zjarri.
Familja e prekur, e identifikuar si familja Manati, është me origjinë nga Lushnja.
Kushërira e familjes, Alessia Firi, ka hapur një fushatë në GoFundMe, e cila deri në momentin e raportimit kishte mbledhur më shumë se 89 mijë dollarë për shpenzimet mjekësore dhe funeralet.
“Familja dhe komuniteti i tyre janë plotësisht të pikëlluar ndërsa përballen me dhimbjen e padurueshme të kësaj humbjeje, ndërkohë që mbajnë shpresën për shërim dhe rimëkëmbje”, shkroi Firi në përshkrimin e fushatës.
Ndërkohë, autoritetet amerikane kanë nisur hetimet për të përcaktuar shkakun dhe rrethanat e zjarrit.