Koordinatorja e komiteteve tek Lëvizja Vetëvendosje, Dejona Mihali, i ka reaguar kryetarit të Komunës së Skenderajt, Sami Lushtakut, pasi ky i fundit e pyeti se cilat shërbime e sollën atë në Kosovë.
Mihali u ndal tek pika ku Lushtaku përmendi babain e saj, Aleksandrin, duke thënë se ai dhe shokët e Sami Lushtakut s’i afrohen, siç u shpreh ajo, as tek këmbët, shkruan Insajderi.
“Ti dhe soji yt që për 1 vit që ke mbajt armën në krah, i ke dhënë vetes të drejtën me grabit pasurinë popullit tënd 20 vjet, nuk i afroheni as të këmbët Aleksandrit dhe shokëve të tij. Se ata po i afrohen të 80-tave dhe kurrë nuk ia kanë punuar pas shpine as Shqipërisë as shqiptarisë. E kundërta, krejt jetën kanë punuar me nder. E ashtu do t’i mbyllin sytë, të nderuar”, ka deklaruar Mihali.
Ajo ka përdorur gjuhë akoma më të rëndë ndaj Sami Lushtakut.
“Çka me thënë njeriu për ty? Faqja e zezë. Ngado plaçk, haraç, dhunë, gangsterllëk, budallallëk, pisllëk”, thotë ajo, duke shtuar “Veç ai vit i luftës, shyqyr zotit që e ke dhe atë”.
“Por edhe për atë mbase me të pyet kur erdhe në luftë o zotëri? Në cilin muaj e vit?”, përmbyll shkrimin ajo. /Insajderi.org/