Më 15.06.2026, në ora 19:30, në SPB Shkup, A.S. nga Shkupi ka raportuar se në një park në zonën e Shutkës ka gjetur një foshnjë të braktisur, të moshës rreth shtatë deri në tetë muajsh, të lënë në një ulëse parku.
Në vendin e ngjarjes kanë dalë menjëherë zyrtarët policorë, ndërsa një ekip i Ndihmës së Shpejtë e ka transportuar foshnjën në Kompleksin e Klinikave “Nënë Tereza”, ku pas kontrollit mjekësor është konstatuar se ajo është në gjendje të mirë shëndetësore dhe pa lëndime të dukshme.
Pas masave të ndërmarra nga policia, në Stacionin Policor të Shutkës janë thirrur për bisedë M.M. (49), I.M. (54) dhe Sh.M. (32), të gjithë nga Shkupi. Ata kanë sqaruar se Sh.M. ishte takuar me S.N. në zonën e Qendrës, e cila ia kishte lënë foshnjën për ta ruajtur.
Sipas deklarimeve, pasi S.N. nuk është kthyer më, Sh.M. së bashku me foshnjën ka shkuar në lagjen Shutkë dhe e ka lënë fëmijën në park.
Për rastin është njoftuar prokurori publik dhe po ndërmerren masa për zbardhjen e plotë të ngjarjes.