Rritja e çmimeve të produkteve ushqimore ka bërë që përgatitja e sofrës së Fitër Bajramit të jetë gjithnjë e më e kushtueshme për familjet në Maqedonia e Veriut.
Qytetarët thonë se edhe për një sofër modeste duhen të paktën 50 euro, ndërsa në Kosova dhe Shqipëria shpenzimet për një familje mund të arrijnë deri në 80–120 euro.
“Më së paku 50 euro të duhen për të shtruar sofrën e Bajramit në mënyrë modeste”, thotë për Alsat një qytetar në Maqedonia e Veriut, të cilin e takuam duke blerë produktet e fundit për festën.
Sipas qytetarëve, rritja e vazhdueshme e çmimeve të produkteve bazë ka vështirësuar përgatitjet për festën, sidomos për familjet me të ardhura më të ulëta dhe pensionistët.
“Çmimet janë katastrofë, janë të papërballueshme. Me 300 euro pension çfarë të blejmë? Me 50 euro nuk mund të bësh pothuajse asgjë. Mishi është shtrenjtë, kështu që shumica marrin vetëm mish pule”, thotë një qytetar.
Edhe në Kosova dhe Shqipëria qytetarët përballen me çmime më të larta të produkteve ushqimore. Sipas tyre, për një familje me katër anëtarë, përgatitja e sofrës së Fitër Bajramit kushton mesatarisht nga 80 deri në 120 euro, në varësi të produkteve që blihen, përcjell INA.
Shumë familje, sidomos në zonat rurale, thonë se për të kursyer para vazhdojnë traditën e përgatitjes së bakllavasë në shtëpi.
“Çmimet rriten sidomos gjatë festave. Për një familje të vogël duhen të paktën 80 euro për të përgatitur sofrën e Bajramit”, thotë një qytetare.
Edhe tregtarët thonë se këtë vit shitjet kanë qenë më të dobëta krahasuar me vitin e kaluar.
“Ka pasur më pak shitje se vitin e kaluar. Disa produkte janë shtrenjtuar, ndërsa disa kanë mbetur me të njëjtin çmim, por qytetarët gjithsesi duhet të blejnë për festën”, thotë një shitës.
Ndër produktet më të kërkuara për Fitër Bajramin mbeten frutat e thata dhe frutat arrore. Sipas tregtarëve, një nga rritjet më të mëdha të çmimeve këtë vit është vërejtur te lajthitë, të cilat në disa tregje kanë arritur deri në 1500 denarë për kilogram, dukshëm më shtrenjtë se vitin e kaluar.