Sarah Dzafces, vajza me origjinë nga Kosova e shpallur “Miss Finland 2025”, do të mbetet pa kurorën e saj pas një gjesti që u perceptua si racist, njoftuan organizatorët e konkursit të bukurisë gjatë një konference për media të enjten.
Dzafces, e cila u kurorëzua në shtator, u përfshi në një stuhi reagimesh në rrjetet sociale pasi u publikua një fotografi ku ajo dukej duke bërë një gjest me gishta që shtrëngonin sytë në një formë të pjerrët, një veprim që u interpretua si tallje ndaj personave aziatikë.
Në foto, nën imazh shkruhej në finlandisht: “kiinalaisenkaa soyomas”, që përafërsisht përkthehet si “duke ngrënë me një person kinez”.
Reagimet e publikut ishin të menjëhershme dhe të forta, duke nxitur debat dhe kritika të shumta për sjelljen e saj. Fillimisht, Dzafces u përpoq të justifikonte veprimin duke thënë se kishte përkulur sytë për shkak të një “dhimbjeje të fortë koke”, por shpjegimi i saj nuk u pranua nga organizata Miss Finland.
Si rezultat i vendimit, Tara Lehtone, e cila u rendit e dyta pas Dzafces, do të marrë vendin e saj si Miss Finland 2025. Organizatorët theksuan rëndësinë e ruajtjes së standardeve të etikës dhe respektit në këtë konkurs, duke theksuar se çdo sjellje që cenon këto parime nuk do të tolerohet.
Sarah Dzafces, e lindur në Oulu dhe e rritur në Kuopio, ka rrënjë nga Kosova.