Është dieta që ka fituar popullaritet të madh në rrjetet sociale dhe duket se ofron edhe një përfitim tjetër, përveç humbjes së peshës. Arsyeja është dieta ketogjenike, e cila sipas një studimi të kohëve të fundit mund të kontribuojë në trajtimin e depresionit tek të rinjtë.
Në mënyrë specifike, u zbulua se kjo dietë e veçantë, e cila përfshin konsum të ulët në karbohidrate dhe të lartë në yndyrë, mund të zvogëlojë simptomat e depresionit me rreth 70% në më pak se tre muaj, duke zvogëluar simptomat me 20% më shumë sesa trajtimet aktuale, siç janë psikoterapia dhe medikamentet. Studimi u botua në Translational Psychiatry .
Edhe pse nuk është e qartë saktësisht se si dieta lufton sëmundjet mendore, 16 studentë të Universitetit të Ohajos që vuanin nga depresioni panë që shëndeti i tyre mendor u përmirësua pothuajse 3 herë më shumë kur ndoqën dietën.
Përmirësimi i performancës njohëse
Përveç kësaj, performanca e tyre në testet njohëse u përmirësua, ndërsa të gjithë studentët humbën peshë, mesatarisht 5 kilogramë, ndërkohë që ulën dhjamin trupor me 2.4%. Humbja e peshës dhe performanca më e mirë akademike janë lidhur në të kaluarën me përmirësimin e shëndetit mendor.
Sidomos për studentët, nga të cilët më shumë se 40% sipas një studimi, raportojnë se përjetojnë simptoma të depresionit, përdorimi i kësaj diete mund të ofrojë një qasje më të personalizuar ndaj një gjendjeje të shëndetit mendor shpesh dobësuese.
Studiuesit shpresojnë të kuptojnë më mirë marrëdhënien midis dietës ketogjenike dhe përmirësimit të simptomave të depresionit përmes studimeve të mëtejshme dhe një prove klinike më të gjerë.
Dieta ketogjenike duket të jetë një trajtim plotësues i mundshëm për depresionin, me reduktim të ndjeshëm të simptomave dhe përmirësime në mirëqenie dhe performancë njohëse. Megjithatë, nevojiten studime klinike më të mëdha për të konfirmuar dhe kuptuar mekanizmat e veprimit.