Dizajnerja franceze e brendshme, Anne Deneuchatel (53), u bë kryefjalë e mediave ndërkombëtare pasi zbuloi se kishte rënë pre e mashtruesve që pretendonin se ishin Brad Pitt, duke i dhënë atyre më shumë se 800,000 euro. Në librin e saj të ri “Je ne serai plus une proie” (Nuk do të jem më pre), ajo rrëfen detajet e mashtrimit, duke përfshirë edhe përfundimin befasues: ndjehet e lumtur që kjo gjë ndodhi, pasi e çoi drejt divorcit nga bashkëshorti.
Deneuchatel tregoi se ndihej e vetmuar dhe e bllokuar në një martesë të pakënaqshme me një “milioner egoist dhe manipulativ” kur mori një mesazh në Instagram nga një person që prezantohej si nëna e Brad Pitt. Shpejt nisi të komunikonte me një aktor të rremë përmes Telegramit, dhe, siç thotë ajo, u bë “e varur” nga bisedat dhe jetonte në një “iluzion të plotë”.
Kur mashtruesi filloi t’i kërkonte para, Deneuchatel ndjeu dashuri dhe vëmendje, gjë që i mungonte në martesën e saj. “Bashkëshorti më kishte vendosur në një situatë të vështirë. Më tha që duhet të isha e kënaqur që isha ‘trofeu’ i tij. Nuk kisha më asnjë pavarësi. Në një moment, dukej më e lehtë të ndihmoja ‘Bradin’ sesa veten”, rrëfeu ajo për Le Monde.
Gjatë muajve, ata shkëmbyen mesazhe intime. Mashtruesi i rremë i tregonte asaj për varësinë e tij nga alkooli, vetminë dhe divorcimin nga Angelina Jolie, ndërsa ajo i rrëfente problemet me bashkëshortin. Deneuchatel thotë se ndihej sikur ishte në “hënë të mjaltit të zgjatur” ndërsa ai e mbushte me mesazhe romantike, këngë dashurie, madje edhe oferta për martesë.
“Mbretëresha ime”, i shkruante ai. “Ti je gjithçka që kam. Të adhuroj. Shumë të dua, zemër.” Për shkak të lidhjes intensive, ajo u shkëput nga realiteti. “U shkëputa nga jeta ime normale për të jetuar një fantazi të plotë. Ndihem sikur jam vetvetja plotësisht”, rrëfen ajo.
Gjatë 14 muajve, nga prilli 2023 deri në qershor 2024, ajo i transferoi më shumë se 800,000 euro. Fillimisht, paratë shërbyen për të paguar taksat doganore të dhuratave që mashtruesi pretendonte se i kishte blerë, por që kurrë nuk mbërritën. Më vonë, ajo pagoi shpenzime të mëdha spitalore, pasi mashtruesi e bindte se vuante nga kanceri i veshkave dhe kishte nevojë për transplant.
Mashtruesi pretendonte se llogaria e tij bankare ishte e ngrirë për shkak të një procesi divorci. Ai dërgonte edhe foto të rreme me AI, duke pretenduar se ishte në krevat spitali. Në një moment, “Brad” ra në koma, duke e detyruar Anne të paguante edhe penalitete për studio hollivudiane, pasi xhirimi i filmit të tij u vonua.
Deneuchatel ndërpreu pagesat pasi mori një kërkesë për afërsisht 15,000 euro për një udhëtim me avion privat. E lodhur emocionalisht dhe e izoluar nga familja dhe miqtë, ajo denoncoi rastin në polici. Hetimi zbuloi se pas gjithçkaje qëndronin tre burra nga Nigeria.
Pasi historia e saj u bë publike, mashtruesit i dërguan mesazhin e fundit: “Dashuri, llogaria ime në Telegram u hakuar nga mashtruesit. Tani do bëj gjithçka për të siguruar sigurinë tonë”.
“Më vjen vërtet keq nëse mungesa ime e kujdesit shkaktoi këtë situatë”, thuhej në mesazh.
Megjithëse humbi shumë para dhe përfundoi në trajtim psikiatrik, Deneuchatel thotë se divorci nga bashkëshorti është “gjëja e vetme pozitive” që doli nga kjo përvojë e dhimbshme./GazetaExpress/