Edicioni i 24-t u hap nga Drama Shqipe pranë Teatrit “Trajko Prokopiev” nga Kumanova, e cila u shfaq me dramën “Vjedhja e diamantit” të autorëve Henri Levis, Xhonatan Sajer dhe Henri Shields, me regji të Qazmedin Nuredinit
Dibër, 24 shtator – Mbrëmë, në Qendrën për Kulturë, nisi Edicioni i 24-t i Festivalit “Teatri Shqiptar në Maqedoni”. Në hapjen e festivalit fjalë përshëndetëse mbajti drejtori i festivalit, Ylber Nuredini, i cili theksoi se prej më shumë se dy dekadash ky festival ka pasur një rrugëtim të suksesshëm. Ai nënvizoi se në këtë edicion marrin pjesë teatro nga Maqedonia e Veriut, Shqipëria, Kosova dhe Lugina e Preshevës.
Edicioni i 24-t u hap nga Drama Shqipe pranë Teatrit “Trajko Prokopiev” nga Kumanova, e cila u shfaq me dramën “Vjedhja e diamantit” të autorëve Henri Levis, Xhonatan Sajer dhe Henri Shields, me regji të Qazmedin Nuredinit. Drama e Kumanovës u prezantua me sukses para publikut dibran dhe u shpërblye me duartrokitje frenetike nga artdashësit.
Në netët e ardhshme do të prezantohen: Teatri Shqiptar për të Rinj dhe Fëmijë nga Shkupi, Teatri Kombëtar Shqiptar nga Shkupi, Teatri nga Presheva, Teatri “Shahin Spahivogli” nga Tirana, Teatri nga Gostivari, Teatri nga Tetova, Teatri Kombëtar i Kosovës nga Prishtina, si dhe Kuarteti i udhëhequr nga Pllamenka Trajkovska, një projekt i Qendrës për Kulturë në Dibër.
Festivali do të përfundojë më 30 shtator me ceremoninë e ndarjes së çmimeve.
Natën e parë, përveç publikut dibran, hapjen e festivalit dhe shfaqjen e trupës nga Kumanova e ndoqën edhe artdashës nga disa qytete të tjera të vendit, si dhe nga qytetet kufitare të Shqipërisë. Dibranët vijojnë të mbështesin kërkesën e drejtorisë për institucionalizimin e Festivalit “Teatri Shqiptar në Maqedoni” nga ana e Ministrisë së Kulturës, kërkesë që është ngritur prej vitesh.
Edhe ky edicion realizohet me përkrahjen e Ministrisë së Kulturës së RMV-së, Komunës së Dibrës, Qendrës për Kulturë, si dhe disa kompanive vendore dhe dibrane.