Sot shënohet 16-vjetori i njërës prej ndeshjeve më të diskutueshme të Ligës së Kampionëve në histori, pasi më 6 maj 2009, Chelsea dhe Barcelona u takuan në një ndeshje të dytë gjysmëfinale.
Ndeshja kthyese u shoqërua nga një rivalitet i madh, kurse nisi shumë mirë për skuadrën angleze, e cila mori avantazhin me super golin nga Essien.
Megjithatë, me anë të një goli të mrekullueshëm në fund të ndeshjes, Andres Iniesta i siguroi Barcelonës finalen e madhe, atë vit kur edhe fituan tripletën e famshme.
Lojtarët e Chelsea ishin ankuar shumë në referimin që bëri gjyqtari Tom Henning Ovrebo, i cili më pas kishte pranuar se kishte bërë disa gabime dhe se skuadra angleze meritonte një penallti.
“Nuk mendoj se tifozët e Chelseat kanë të drejtë kur pretendojnë katër nga pesë penallti, por mendoj se të gjithë ata që e njohin futbollin dhe ligjet e lojës e dinë se një penallti duhej të ishte dhënë”, deklaroi ai.
Pasi e mbylli karrierën e tij si gjyqtar, Tom Henning Ovrebo u bë psikolog, pasi studioi këtë lëndë gjatë viteve të tij të rinisë në universitet dhe punon në Shkollën Norvegjeze të Shkencave Sportive
Pavarësisht të gjitha abuzimeve, norvegjezi këmbëngul se ai ende kujton me dashuri karrierën e tij si gjyqtar. “Motoja ime në jetë është se ‘Është më mirë të të kritikojnë sesa të të harrojnë njerëzit’, kështu që mendoj se tifozët mund të vazhdojnë të më ngacmojnë nëse duan; për mua, kjo nuk është problem”, shtoi ai.
“I kujtoj ndeshjet e mia me kujtime të mrekullueshme. Nuk është problem nëse njerëzit duan ta përdorin atë ndeshje si shembull [të arbitrimit të keq]; kjo është në rregull për mua”, përfundoi Ovrebo.
/GazetaBlic Sport/