E diel, 26 Mars 2023 – 16:00
Zëdhënësi i Bashkimit Evropian, Peter Stano ka bërë të ditur se ditët në vijim do të iniciohet procesi për hapat e parë të zbatimit të marrëveshjes së Ohrit.
“Në ditët në vijim, tani me miratimin nga Këshilli Europian institucionet e BE-së do të iniciojnë procesin për operacionalizimin e hapave të parë të fazës së zbatimit së bashku me Palët. Siç tha Përfaqësuesi i Lartë të enjten: ‘Unë do t’i këshilloja ata ta bëjnë punën e tyre’”, tha Stano, transmeton euronews përcjell albinfo.ch.
Siç janë marrë vesh palët, dispozitat e Marrëveshjes (përfshirë Aneksin) tani do të inkorporohen në Kapitullin 35 për Serbinë dhe në agjendën e Grupit Special për Normalizimin për Kosovën.
“Kjo do të thotë se palët do të jenë të detyruara kontraktualisht t’i zbatojnë dispozitat nëse dëshirojnë të bëjnë përparim drejt BE-së. Moszbatimi do të thotë ta braktisësh rrugën drejt BE-së”, tha Stano.
