Shkup, 23 qershor – Sekretari i përgjithshëm i Bashkimit Demokratik për Integrim, Arbër Ademi, ka akuzuar koalicionin VLEN dhe kryetarin e Komunës së Tetovës, Bilall Kasami, për mosveprim në mbrojtjen e emrave shqiptarë të rrugëve dhe shesheve në Tetovë, pas vendimit të fundit të Gjykatës Kushtetuese.
Në një reagim publik, Ademi vlerëson se arsyetimi i Gjykatës Kushtetuese ka nxjerrë në pah, siç thotë ai, “pafuqinë dhe gënjeshtrat e VLEN-it”, duke pretenduar se institucionet e drejtuara nga ky koalicion nuk kanë ndërmarrë veprimet e nevojshme për mbrojtjen e vendimit të vitit 2007 për emërtimin e rrugëve.
Postimi i plotë i Arbër Ademit:
Gjykata Kushtetuese nxori në shesh pafuqinë dhe gënjeshtrat e VLEN-it.
Bilall Kasami, për 14 muaj, nuk ndërmori asgjë për t’i ruajtur emrat shqip në Tetovë.
Bilall Kasamit katër herë iu kërkua nga Gjykata Kushtetuese që të dorëzonte dokumente, por ai nuk bëri asgjë. Lexojeni paragrafin e dytë për këtë.
Qeveria ku bën pjesë VLEN-i, tri herë nuk ka dorëzuar dokumentacion për t’i mbrojtur emrat shqip në Tetovë. Lidhur me këtë, shiheni paragrafin e tretë të vendimit të Gjykatës Kushtetuese.
E dimë se e doni Titon, por duajeni në shtëpi. Shqiptarët me kohë i kanë dhënë përgjigjen e merituar Titos.
