Policia ka goditur një tjetër rast të mallrave kontrabandë. Një 36-vjeçar është arrestuar në zonën e Bilishtit, pasi gjatë kontrolleve i janë gjetur paketa kontrabandë me qëllim shitjen.
“Në Bilisht, shërbimet e Policisë kanë ndaluar për kontroll automjetin që drejtonte 36-vjeçari, ku kanë gjetur 30 steka me cigare të markave të ndryshme, të dyshuara të kontrabanduara. Në vijim, është ushtruar kontroll edhe në dyqanin e shtetasit A. Y., ku gjithashtu janë gjetur paketa të tjera me cigare, për të cilat ky shtetas nuk kishte fatura tatimore”, thuhet në njoftim.
Stekat me cigare u sekuestruan në cilësinë e provës materiale. Materialet procedurale i kaluan Prokurorisë pranë Gjykatës së Shkallës së Parë Korçë, për veprime të mëtejshme.