Prokuroria Speciale ka përcjellur një ftesë të dytë në adresë të kryeministrit Kurti për intervistim në cilësinë e dëshmitarit.
Kështu ka konfirmuar zëdhënësi i Qeverisë së Kosovës, Përparim Kryeziu.
“Kabineti i kryeministrit i është përgjigjur kësaj ftese duke ritheksuar gatishmërinë e kryeministrit që t’i mirëpres prokurorët në zyrën e tij për intervistim. Për këtë kemi propozuar tre orare të takimit. Një për sot, dhe dy orare tjera për javën tjetër”, ka pohuar ai.
Tutje, Kryeziu thotë se presin përgjigje pozitive nga prokuroria.
“Presim një përgjigje pozitive meqë sipas praktikës kjo nuk do të ishte hera e parë që një kryeministër intervistohet brenda zyrës së tij, dhe i mirëpresim në kryeministri”, shtoi mes tjerash ai.
Ndryshe, më herët, kryeministri i Kosovës, Albin Kurti, ka refuzuar të komentojë në lidhje me ftesën e bërë nga Prokuroria Speciale, ku ai është thirrur në cilësinë e dëshmitarit.