Në Zagreb janë nënshkruar marrëveshjet dhe memorandumet ndërmjet dy vendeve.
Marrëveshja për sigurinë sociale midis Republikës së Kroacisë dhe Republikës së Kosovës u nënshkrua nga Marin Piletiq, ministër i Punës, Sistemit Pensional, Politikës Familjare dhe Sociale të Republikës së Kroacisë dhe Hekuran Murati, ministër i Financave, Punës dhe Transfereve të Republikës së Kosovës.
Marrëveshja midis Qeverisë së Republikës së Kroacisë dhe Qeverisë së Republikës së Kosovës për njohjen dhe shkëmbimin reciprok të patentave të shoferit u nënshkrua nga Davor Bozhinovićq, zëvendëskryeministër dhe ministër i Brendshëm i Republikës së Kroacisë, dhe Xhelal Sveçla, ministër i Brendshëm i Republikës së Kosovës.
Marrëveshja midis Qeverisë së Republikës së Kroacisë dhe Qeverisë së Republikës së Kosovës për bashkëpunim në mbrojtjen nga fatkeqësitë natyrore, teknike dhe teknologjike, u nënshkrua nga Davor Bozhinoviq, zëvendëskryeministër dhe Ministër i Brendshëm i Republikës së Kroacisë, dhe Xhelal Sveçla, ministër i Brendshëm i Republikës së Kosovës.
Memorandumi i Mirëkuptimit midis Ministrisë së Punëve të Brendshme të Republikës së Kroacisë, Qendrës për Ekspertizë dhe Kërkime Forenzike “Ivan Vuçetiq”, dhe ministrisë së Punëve të Brendshme të Republikës së Kosovës, Agjencisë së Kosovës për Forenzikë në fushën e forenzikës, u nënshkrua nga Davor Bozhinoviq, zëvendëskryeministër dhe Ministër i Brendshëm i Republikës së Kroacisë, dhe Xhelal Sveçla, ministër i Brendshëm i Republikës së Kosovës.
Memorandumi i Mirëkuptimit midis Ministrisë së Punëve të Brendshme të Republikës së Kroacisë, Drejtorisë së Policisë, Akademisë së Policisë “Polici i Parë Kroat”, dhe Ministrisë së Punëve të Brendshme të Republikës së Kosovës, Akademisë së Kosovës për Siguri Publike, për forcimin e bashkëpunimit në fushën e arsimit dhe kërkimit, u nënshkrua nga Davor Bozhinoviq, zëvendëskryeministër dhe Ministër i Brendshëm i Republikës së Kroacisë dhe Xhelal Sveçla, ministër i Brendshëm i Republikës së Kosovës./RTK Live
Kryeministri i Kroacisë, Andrej Plenkoviq ka pritur kryeministrin e Kosovës, Albin Kurti me nderime të larta shtetërore.
Të dy kryeministrat kanë zhvilluar një takim të përbashkët, teksa pritet edhe nënshkrimi i marrëveshjeve ndërmjet dy vendeve në fushën e sigurimeve sociale, për njohje të ndërsjellë të patentë shoferëve, për bashkëpunim në mbrojtje nga fatkeqësitë natyrore, teknike dhe teknologjike, dhe bashkëpunim në fushën e mjekësisë ligjore.
Pas Kroacisë, kryeministri Kurti udhëton për në Slloveni.