Subscribe
Presidentja e Kosovës, Vjosa Osmani dhe kryeministri Albin Kurti i kanë bërë thirrje Bashkimit Europian të ushtrojë presion mbi Serbinë për nisjen e zbatimit të marrëveshjes për të cilën u ra dakord në takimin e Ohrit më 18 mars.
Në një deklaratë për mediat, Osmani tha se premtimet që janë dhënën në kuadër të dialogut nuk kanë asnjë vlerë politike apo juridike për Beogradin.
VJOSA OSMANI
PRESIDENTE E KOSOVES
“Serbia akoma pa u mbushur 24 orë nga dakordimi në Ohër, njëlloj siç ndodhi edhe në shkurt e përsëriti edhe në mars. Pra tregoi që premtimet që i ka dhënë në kuadër dialogut, nuk kanë asnjë vlerë për të as politike e as juridike dhe rrjedhimisht njoftoi edhe komunitetin ndërkombëtar që ai nuk do të zbatojë obligimet, të cilat qartë dalin nga marrëveshja bazë dhr nga aneksi. Tani pavarësisht që u dakordësua në Ohër tani në mars, më lejoni të riktheksoj që teksti i marrëveshjes bazë mbetet si i tillë dhe nuk ndryshohet.”
Të njëjtën kërkesë bëri edhe kryeministri Albin Kurti.
Në një deklaratë për mediat këtë të mërkurë ai tha se Kosova ka bërë një ofertë konkrete me tre pika kryesore në ‘këmbim’ të asosacionit por është refuzuar nga pala tjetër.
ALBIN KURTI
KRYEMINISTËR I KOSOVËS
“Kam bërë ofertën konkrete duke iu thënë se nëse pala serbe është dakord të pranojë tre shtylla bazike, kushtetutën e Kosovës, vendimin e Gjykatës Kushtetuese për Asociacionin dhe qëndrimin e Brukselit dhe Uashingtonit për Asociacionin, atëherë unë do të isha i gatshëm që të nesërmen në mëngjes të dorëzoja statutit e Asociacionit mirëpo është refuzuar”
Kryeministri Kurti dhe Presidenti Vuçiç u takuan në 18 mars ku pas 12 orësh diskutime dakordësuan aneksin e marrëveshjes së propozuar nga Bashkimi Europian për normalizimin e marrëdhënieve mes Kosovës dhe Serbisë por pa firmosur në letër.
Ndërkombëtarët janë shprehur se aneksi i marrëveshjes është tashmë një detyrim ligjor për të dy palët por ende nuk është hedhur asnjë hap drejt zbatmit të saj.