VLEN ka publikuar dokumente zyrtare nga seanca e 158-të e Qeverisë, e mbajtur më 6 qershor 2023, përmes të cilave pretendon se ish-funksionarët e BDI-së institucionalisht i hapën rrugë shitjes së aksioneve shtetërore në “Stopanska banka” – Manastir, sot e njohur si Alta Banka Maqedoni.
Në një konferencë për media, Saranda Imeri Stafai nga VLEN deklaroi se vendimin për dhënien e pëlqimit për shitjen e aksioneve shtetërore e kishte nënshkruar personalisht ish-zëvendëskryeministri i parë, Artan Grubi.
Sipas saj, në seancën e Qeverisë kishin marrë pjesë edhe ish-ministri i Financave, Fatmir Besimi, ish-ministri i Punëve të Jashtme, Bujar Osmani dhe ish-ministri i Ekonomisë, Kreshnik Bekteshi.
“Artan Grubi personalisht e ka nënshkruar vendimin për shitjen e aksioneve shtetërore në ‘Stopanska banka’ – Manastir, si përfundim i një seance të Qeverisë ku kanë marrë pjesë Fatmir Besimi, Bujar Osmani dhe Kreshnik Bekteshi”, deklaroi Imeri Stafai.
Ajo bëri të ditur se si dëshmi VLEN ka prezantuar dy dokumente zyrtare: procesverbalin e seancës së 158-të të Qeverisë, të mbajtur më 6 qershor 2023, si dhe vendimin e publikuar në “Gazetën Zyrtare” nr. 123, më 13 qershor 2023.
Sipas dokumenteve të prezantuara nga VLEN, në pikën e pestë të rendit të ditës ishte shqyrtuar informacioni për shitjen e aksioneve në pronësi të Agjencisë për Menaxhimin e Pronës së Konfiskuar. Me konkluzionin numër 6 ishte dhënë pëlqimi për shitjen e aksioneve shtetërore në “Stopanska banka” SHA Manastir.
Imeri Stafai pretendoi se ky vendim përbën një hallkë të rëndësishme në atë që VLEN e cilëson si një operacion të koordinuar për marrjen nën kontroll të bankës nga kapitali serb.
“Kur bashkohen të tri pjesët e këtij mozaiku, i gjithë operacioni milionësh i BDI-së del në dritë”, u shpreh ajo.
Në këtë kontekst, përfaqësuesja e VLEN-it rikujtoi edhe pretendimet e mëparshme për kompaninë “AS Senjak”, përmes së cilës, sipas saj, krushku i Ali Ahmetit kishte blerë një pako aksionesh në bankën e Manastirit. Ajo pretendoi gjithashtu se një kompani e lidhur me të kishte marrë kredi prej pesë milionë eurosh drejtpërdrejt nga selia qendrore e Alta Bankës në Beograd.
Sipas versionit të paraqitur nga VLEN, aksionet shtetërore të nxjerra në shitje dhe aksionet private të blera përmes “AS Senjak” përfunduan në duart e manjatit serb Davor Macura.
Duke iu referuar këtyre pretendimeve, Imeri Stafai ngriti disa pyetje ndaj Ali Ahmetit, Fatmir Besimit dhe Bujar Osmanit.
“Vallë, më 6 qershor 2023, kur Artan Grubi nënshkroi vendimin për shitjen e aksioneve shtetërore në ‘Stopanska banka’ – Manastir, në lidershipin e BDI-së ishte bërë plani që banka të përgatitej për marrjen nën kontroll nga Alta Banka e Beogradit?”, pyeti ajo.
Ajo kërkoi gjithashtu të sqarohet nëse roli i ish-funksionarëve të BDI-së në Qeveri kishte qenë që institucionalisht të mundësonin shitjen e aksioneve shtetërore, ndërkohë që, sipas pretendimeve të VLEN-it, rrethi familjar i Ali Ahmetit grumbullonte aksione private.
Në fund, VLEN i bëri thirrje Prokurorisë Publike dhe Drejtorisë së Inteligjencës Financiare që të zgjerojnë hetimet dhe të marrin në pyetje ish-funksionarët e BDI-së që kanë marrë pjesë në miratimin e vendimeve për shitjen e aksioneve.
“Shndërrimi i Qeverisë në shërbim të bizneseve milionëshe të familjes së Ali Ahmetit dhe të manjatëve rajonalë duhet të ketë përgjegjësi penale”, përfundoi Saranda Imeri Stafai.