Deputetja e VLEN-it, Imerlije Saliu, në fjalimin e saj në Kuvendin e Maqedonisë së Veriut, ka mbështetur ratifikimin e marrëveshjes me Republikën e Shqipërisë për kontrolle të përbashkëta kufitare, duke theksuar rëndësinë e saj për lehtësimin e qarkullimit të qytetarëve dhe mallrave ndërmjet dy vendeve.
Saliu theksoi se kjo marrëveshje është pjesë e orientimit strategjik të Qeverisë dhe VLEN-it për forcimin e bashkëpunimit me Shqipërinë dhe Kosovën, duke e vendosur në fokus lidhjen infrastrukturore, energjetike dhe ekonomike me vendet shqiptare.
Ajo rikujtoi se pas zbatimit të sistemit të kontrolleve të përbashkëta me Kosovën, rezultatet tashmë janë të dukshme, me shkurtim të ndjeshëm të pritjeve dhe rritje prej 50 për qind të qarkullimit krahasuar me vitin e fundit para zbatimit të këtij sistemi.
Duke folur për marrëveshjen me Shqipërinë, deputetja e VLEN-it bëri të ditur se ajo parasheh vendosjen e pikave të përbashkëta të kalimit kufitar në pesë vendkalime ndërmjet dy shteteve, përfshirë edhe avancimin e mëtejshëm të kontrolleve në pikën kufitare të Qafë Thanës, ku tashmë funksionon sistemi One Stop Shop.
“Për ne si VLEN, lidhjet me Republikën e Kosovës dhe Republikën e Shqipërisë kanë rëndësi të veçantë. Këtë orientim e dëshmojmë me projekte konkrete dhe rezultate konkrete, jo me folklor bosh dhe parulla patetike”, theksoi Saliu.
Ajo nënvizoi se fqinjësia e mirë dhe integrimi rajonal nuk duhet të mbeten vetëm deklarata politike, por duhet të përkthehen në lehtësira konkrete për qytetarët, bizneset dhe ekonomitë e rajonit.
Sipas Saliut, marrëveshja përfaqëson një hap të rëndësishëm në frymën e Procesit të Berlinit dhe integrimit evropian, duke synuar një Ballkan Perëndimor me më pak barriera administrative, më pak pritje dhe më shumë bashkëpunim.