Maqedonia e Veriut po shënon rritje të numrit të të huajve që vijnë për të jetuar dhe punuar në vend. Gjatë vitit 2025 janë regjistruar 7.032 imigrantë, pothuajse trefish më shumë krahasuar me vitin 2023, kur ishin regjistruar 2.325 persona.
Sipas të dhënave të Entit Shtetëror të Statistikës, në krye të listës janë shtetasit e Turqisë, me 3.966 persona, duke përbërë më shumë se gjysmën e imigrantëve të ardhur në vend.
Pas tyre renditet India me 804 persona, Bangladeshi me 552 dhe Kosova me 449 persona. Në mesin e vendeve me numër të konsiderueshëm imigrantësh është edhe Nepali, nga i cili gjatë vitit 2025 kanë ardhur 430 persona. Ky është një ndryshim i madh krahasuar me vitin 2023, kur ishin regjistruar vetëm dy shtetas nga ky vend.
Lista e dhjetë vendeve plotësohet nga Shqipëria me 278 persona, Serbia me 255, SHBA-ja me 121, Gjermania me 102 dhe Bosnja e Hercegovina me 75 persona.
Statistikat tregojnë se përveç vendeve të rajonit, Maqedonia e Veriut po tërheq gjithnjë e më shumë persona edhe nga vendet aziatike dhe ato të Evropës Perëndimore.
Samir Mustafa /SHENJA/