Sipas një analize të realizuar nga portali RACIN.mk bazuar në të dhënat e Sistemit Elektronik të Prokurimeve Publike (ESJN), Komuna e Kumanovës gjatë vitit 2025 ka nënshkruar 97 kontrata për prokurime publike me një vlerë totale prej 13.3 milionë eurosh (818.2 milionë denarë).
Kjo përbën një kërcim marramendës prej 126.4% në krahasim me vitin 2024, kur u nënshkruan 81 kontrata në vlerë prej 5.9 milionë eurosh.
Përveç rritjes dramatike të shpenzimeve, të dhënat nxjerrin në dritë një përqendrim të lartë të parave publike te një numër shumë i kufizuar kompanish, si dhe mungesë të theksuar të konkurrencës.
Pjesa më e madhe e buxhetit është përqendruar te vetëm një kompani. Kompania “KOOP Inzhenering DOO Kumanovo” gjatë 2025 ka fituar 17 kontrata me vlerë të përgjithshme prej 7.6 milionë eurosh (466.7 milionë denarë). Kjo do të thotë se vetëm kjo kompani ka marrë 57% të vlerës totale të të gjithë tenderëve të komunës për vitin 2025.
Për krahasim, në vitin 2024 e njëjta kompani kishte 10 kontrata me vlerë prej 100.8 milionë denarësh — duke shënuar një rritje prej më shumë se katër herë e gjysmë brenda një viti.
Pushteti i pesë kompanive
Përqendrimi nuk ndalet këtu. Tri kompanitë e para me vlerën më të madhe të kontratave mbulojnë 71.7%, ndërsa pesë kompanitë e para marrin pothuajse 80% të të gjithë buxhetit të prokurimeve publike të komunës.
Në vitin 2025, nga 97 kontrata të analizuara, 35 prej tyre u nënshkruan në procedura ku pati vetëm një ofertë. Vlera e tyre arrin në 6 milionë euro (371.1 milionë denarë), që përbën 45.4% të vlerës totale të tenderëve. Edhe pse numri i kontratave me një ofertues mbeti i ngjashëm me vitin 2024 (34 kontrata), vlera e tyre financiare u double-ua për një vit (nga 2.9 në 6 milionë euro).
Projektet e mëdha infrastrukturore
Ndër tenderët më të mëdhenj me vetëm një ofertues përfshihen infrastruktura e ujesjellësit dhe kanalizimit në zonën industriale Reçicë (rreth 3.4 milionë euro, fituar nga “KOOP Inzhenering”) si dhe punimet për rrugën industriale (rreth 1.2 milionë euro, po nga e njëjta kompani).
Salla e sportit: 9 ndryshime kontrate dhe rritje çmimi: Kontrata për rikonstruksionin e sallës së sportit me kompaninë “KING TREJD KO DOO Koçani” (fillimisht me vlerë 1.14 milionë euro) u ndryshua 9 herë midis shtatorit 2024 dhe nëntorit 2025. Përmes një aneks-kontrate, vlera e saj u rrit me 134,000 euro (8.26 milionë denarë ose 11.82%). Përveç rritjes së çmimit, afatet e përfundimit u shtynë tetë herë me arsyetime nga më të ndryshmet: punime shtesë, punë të paparashikuara në teren, vërejtje nga Komiteti Olimpik, ndërrim i mbikëqyrjes teknike dhe procedura administrative.(INA)