Si person i rekrutuar nga Shërbimi Informativ i Serbisë, Prokuroria Speciale e Kosovës, ka ngritur aktakuzë ndaj analistit Fatmir Sheholli duke e ngarkuar me veprat penale spinuazh dhe shantazh. I pandehuri, përmes mesazheve telefonike, ka ndihmuar veprimtarinë e Shërbimit Informativ të Serbisë duke ndarë informacione lidhur me zhvillimet politike, gjendjen e sigurisë dhe funksionimin e institucioneve të Republikës së Kosovës.
Me mbishkrimin “Top sekret 2”, Prokuroria speciale e Kosovës gjeti dokument në të cilin shpalosej një plan për përhapje të radikalizmit fetar në Kosovë dhe rajon. Komunikimet e Shehollit nuk ndalen vetëm në Kosovë e Serbi. Në telefonin e të pandehurit, është gjetur edhe një komunikim me personin e regjistruar si “Viktor Makedonia”, nëpërmjet të cilit, spiuni i Serbisë Sheholli, ka tentuar që ndikimin serb ta shtrin edhe në Maqedoninë e Veriut. Me synimin për të ndërtuar një narrativë negative për shqiptarët në sytë e ndërkombëtarëve dhe për të nxitur migrimin, u punua që të shpërndahej sa më shumë feja islame nëpërmjet ndërtimit masiv të xhamive dhe përmes ndikimit politik dhe mediatik, për t’i bindur të rinjtë sipas planit serb se feja është më e rëndësishme se kobmi.
Dosja prej 80 faqesh e Prokurorisë, pretendon se Sheholli vepronte nën urdhrat e Bojan Dimiqit, i identifikuar si zyrtar i lartë i BIA-s. Në shtator të vitit 2025, i pandehuri u drejtua në Mitrovicë të Veriut për të marrë audio materiale dhe transkripte bisedash të zyrtarëve të Ministrisë për Komunitete dhe Kthim, në këmbim të 5 mijë eurove si shpërblim për kryerjen e detyrës. Aktakuzën ndaj Shehollit për spiunazh e ka komentuar edhe deputeti i Lëvizjes Vetëvendosje, Glauk Konjufca, duke deklaruar Kosova gjatë viteve të fundit ka intensifikuar luftën kundër rrjeteve të tilla.
“Qëllimi i këtyre është shumë i keq, tentojnë me destabilizu Kosovën, e performojnë një luftë hibride dhe speciale kundër personaliteteve të caktuara, kundër qeverisë, kundër kryeministrit Kurti. Domethënë qëllimi i tyre është ky” – Glauk Konjufca, Ministër i Jashtëm i Kosovës.
Në vazhdën e akuzave, Fatmir Sheholli, i akuzuar edhe për shantazh, i kishte kërkuar para personit Arben Jetullahu në formë huazimi, dhe më pas e kishte kërcënuar të njëjtin me publikimin e videove dhe informacioneve që do t’ia dëmtonin rëndë reputacionin dhe autoritetin. Aktakuza është në shqyrtim e sipër në Gjykatën Themelore në Prishtinë. Në fjalët e para Sheholli ka pranuar se ka bashkëpunuar me BIA-n serbe, por ka hedhur poshtë akuzën se këtë e ka bërë për të spiunuar. / Alsat.mk