Sot ka ndërruar jetë Enver Rifati, i njohur si komandant Xhaxhi, një nga luftëtarët e luftës së vitit 2001.
Lajmi për vdekjen e tij lë pas dhimbje te familjarët, miqtë dhe bashkëluftëtarët që e njohën dhe ndanë me të momente të vështira të jetës.
“Emri i komandant Xhaxhit lidhet me periudhën e luftës së vitit 2001, një kohë e rëndë për shqiptarët në Maqedoni, kur shumë burra lanë pas familjet dhe jetën e përditshme për t’u përfshirë në ngjarjet që shënuan historinë e asaj kohe.
Por për Enver Rifatin, kjo histori kishte edhe një dhimbje të veçantë. Në krah të tij qëndroi vëllai, Fadil Rifati, i cili ra dëshmor gjatë luftës, duke lënë pas një plagë që as koha nuk mund ta fshijë lehtë. Sot, me ndarjen nga jeta të Enver Rifatit, familja Rifati përballet me një tjetër humbje të rëndë. Një vëlla që jetoi me kujtimin e vëllait dëshmor tashmë është ndarë nga kjo botë, duke lënë pas kujtime, dhimbje dhe një histori familjare të lidhur ngushtë me ngjarjet e vitit 2001.
Lufta mbaron, vitet kalojnë, por kujtimet për ata që u përballën me ditë të vështira mbeten në kujtesën e familjeve dhe të njerëzve që i njohën. Sot, fjalët e ngushëllimit janë të pakta përballë dhimbjes së kësaj ndarjeje. Familjes Rifati, miqve dhe bashkëluftëtarëve u shprehim ngushëllimet më të sinqerta”, e përkujtojnë bashkëluftërarët.
Kryetari i Bashkimit Demokratik për Integrim (BDI), Ali Ahmeti, ka shprehur ngushëllimet e tij për ndarjen nga jeta të Enver Rufatit, i njohur si Komandant Xhaxhi, duke e kujtuar atë si një nga luftëtarët e Ushtrisë Çlirimtare të Kosovës (UÇK).
“Komandant Xhaxhi do të mbetet përgjithmonë në kujtesën tonë si njëri nga burrat guximtarë që i dolën zot atdheut në ditët më të vështira, duke lënë gjurmë të pashlyeshme në radhët e Ushtrisë Çlirimtare Kombëtare (UÇK)”, shkroi Ahmeti.(INA)