Huzeir Mustafi:Dhuna nuk guxon të bëhet normale në Kumanovën tonë. Heshtja nuk është zgjidhje!

Nuk ka asnjë arsyetim për dhunën. Nuk ka asnjë justifikim për poshtërimin. Si prind, si qytetar i Kumanovës dhe si këshilltar komunal, shpreh shqetësimin dhe indinjatën time të thellë për pamjet ku disa vajza ushtrojnë dhunë ndaj një bashkëmoshatareje, e rrahin, e poshtërojnë dhe e filmojnë sikur vuajtja e dikujt të ishte argëtim. Kjo nuk është trimëri. Kjo është humbje e ndjenjës njerëzore. U bëj thirrje të gjithë prindërve, punoni me fëmijët tuaj. Mësojini të respektojnë, të ndihmojnë dhe të mbrojnë njëri tjetrin. Mos lejoni që fëmijët tanë të shndërrohen në përbindësha që nuk njohin mëshirë. Njëkohësisht, u bëj thirrje Policisë, Prokurorisë, Qendrës për Punë Sociale, shkollave dhe të gjitha institucioneve përgjegjëse që të veprojnë pa vonesë. Çdo rast i dhunës mes të miturve duhet të trajtohet me seriozitet të plotë, në mënyrë që të mbrohet viktima dhe të parandalohet përsëritja e rasteve të tilla. Sot duhet të reagojmë të gjithë. Nesër mund të jetë vonë. Dhuna nuk guxon të bëhet normale në Kumanovën tonë. Heshtja nuk është zgjidhje. Përgjegjësia është e secilit prej nesh!