Bashkimi Demokratik për Integrim (BDI) ka reaguar pasi në delegacionin shtetëror të Maqedonisë së Veriut, i cili po merr pjesë në Samitin e NATO-s në Turqi, nuk është përfshirë asnjë përfaqësues shqiptar. Nga kjo parti vlerësojnë se një qasje e tillë përbën një devijim nga parimet mbi të cilat është ndërtuar shteti dhe dërgon një mesazh të gabuar si në planin e brendshëm, ashtu edhe në arenën ndërkombëtare.
Sipas BDI-së, mungesa e shqiptarëve në delegacionin zyrtar nuk është vetëm çështje protokolli, por pasqyron një qasje politike që bie ndesh me karakterin multietnik të Maqedonisë së Veriut dhe me frymën e Marrëveshjes së Ohrit.
“Në Samitin e NATO-s në Turqi, Maqedonia e Veriut paraqitet me një delegacion pa asnjë përfaqësues shqiptar. Kjo është pasqyrë e një mentaliteti politik që e sheh shtetin si pronë të një etnie, ndërsa shqiptarët vetëm si dekor të brendshëm”, thuhet në reagimin e BDI-së.
Partia opozitare rikujton se Maqedonia e Veriut është ndërtuar mbi parimin e bashkëjetesës ndëretnike dhe se anëtarësimi në NATO është rezultat i një arkitekture politike që mbështetet në barazi, përfaqësim dhe zbatimin e Marrëveshjes së Ohrit.
“Maqedonia e Veriut është shtet multietnik dhe anëtare e NATO-s falë një arkitekture politike që ndërtohet mbi barazi, përfaqësim dhe Marrëveshjen e Ohrit”, thekson BDI.
Në reagim, BDI nënvizon se delegacionet shtetërore në ngjarjet më të rëndësishme ndërkombëtare duhet të reflektojnë përbërjen reale të shtetit dhe jo ta injorojnë atë.
“Delegacionet shtetërore duhet ta reflektojnë realitetin e vendit, jo ta fshijnë atë”, thuhet më tej në reagim.
BDI vlerëson se përjashtimi i shqiptarëve nga përfaqësimi në nivelin më të lartë ndërkombëtar dëmton imazhin e shtetit dhe krijon perceptim të gabuar te qytetarët dhe partnerët ndërkombëtarë.
“Përjashtimi i shqiptarëve nga përfaqësimi më i lartë ndërkombëtar është mesazh i gabuar për qytetarët, për aleatët dhe për vetë karakterin e shtetit”, theksohet në reagim.
Në fund, BDI thekson se një shtet nuk mund të pretendojë përfaqësim të plotë nëse një pjesë e rëndësishme e realitetit të tij politik dhe shoqëror mbetet jashtë institucioneve përfaqësuese.
“Shteti nuk përfaqësohet drejt kur gjysma e realitetit të tij lihet jashtë”, përfundon reagimi i Bashkimit Demokratik për Integrim.