Kryetari i Partisë Demokratike Sali Berisha përsëriti kërkesën për uljen e taksave mbi karburantin. Berisha shfrytëzoi mbledhjen e grupit parlamentar për të theksuar se regjimi fiskal mbi naftën duhet të ndryshojë rrënjësisht për tu ardhur në ndihmë qytetarëve
“Grupi ynë parlamentar dhe opozita kërkon me çdo kusht përmbysjen e sistemit fiskal aktual mbi litrin e naftës. Sistem absolutisht ndëshkues totalisht mbi qytetarin shqiptar. Sistem i cili ka në bazë një taksë prej 1.1 euro për litër nafte. Një marrëzi, një taksë që tejkalon çdo vend tjetër të planetit”, tha Berisha.
Sipas Berishës, sot nafta rëndon mbi xhepat e qytetarëve shqiptarë më shumë edhe se në vendet e BE
“Si mund të justifikohesh para qytetarëve kur ti vendos taksën më të lartë në botë? Më të lartë se Singapori, më të lartë se Hong Kongu, 61 përqind të çmimit të naftës e përcakton taksa. Dhe në qoftë se e proporcionon me të ardhurat, një gjerman shpenzon për naftën 1.25 përqind të të ardhurave ditore. Një shqiptar shpenzon për naftën 7.3 përqind të të ardhurave ditore. 7 herë më shumë”, shtoi Berisha.
Përtej debatit për situatën e rritjes së çmimit, Berisha para deputetëve demokratë foli edhe mbledhjen e Gjykatës së Lartë për ndryshimin e praktikës së kolegjeve të bashkuara mbi masat e sigurimit personal. Sipas Berishës ky vendim i ri i Gjykatës së Lartë do të shërbejë për lirimin e kryetarit të Bashksië së Tiranës Erion Veliaj nga burgu
“Nesër Sadushi, që kërcënon absolutisht sigurinë e Shqipërisë dhe vendeve të rajonit, del me vendimin që ata që janë në paraburgim pa vendim të prerë, të dalin. Ky është vendimi Veliaj. Por nga vendimi Veliaj përfitojnë me dhjetëra bosë të drogës, krerë të organizatave kriminale. Por kjo është gjetur rruga e paqes midis klaneve mafioze”, theksoi Berisha.
Pak ditë më parë Partia Demokratike u nisi edhe nje letër ambasadave në Tiranë ku shprehu shqetësimin për vendimin që pritet të marrë të enjten Gjykata e Lartë në lidhje me masat e sigurisë.