Të gjithë kemi dëgjuar që “durimi është virtyt”, por askush nuk të mëson saktësisht si ta ndërtosh.
Pavarësisht nëse po pret në radhë, je bllokuar në trafik, apo përpiqesh t’i përgjigjesh partnerit që të pyet për herë të tretë “Më fal, çfarë the?”, padurimi mund të ndizet lehtë.
Sipas psikologut klinik Dr. Geoffrey Gold, durimi nuk është diçka që thjesht e ke ose jo. Ai kultivohet përmes praktikës.
“Ka të bëjë me aftësitë emocionale: të përballosh frustrimin, mërzinë dhe stresin, ndërsa mbetesh i vetëdijshëm dhe i dhembshur për veten”, thotë ai.
Ja si mund të punosh çdo ditë për të ndërtuar më shumë durim:
Rimendo përkufizimin tënd për “durim”
Shumë e ngatërrojnë durimin me pasivitetin. Por të jesh i duruar nuk do të thotë të mos ndjesh acarim, do të thotë të pranosh që s’kontrollon gjithçka.
Psikoterapistja Fanny Tristan thotë se njerëzit e paduruar shpesh kanë vështirësi të pranojnë kohën që kërkon një proces. Ndërsa njerëzit “më të qetë” nuk janë të pashqetësuar, ata thjesht e dinë se jeta është kaotike dhe nuk luftojnë me çdo pengesë.
Vendos veten në vendin e tjetrit
Shumë nga shpërthimet tona vijnë nga pritshmëritë e ngurta: “Ai duhet të kishte ardhur në kohë”, “Ajo duhet të më kishte kthyer mesazh”.
Në realitet, askush nuk e jeton jetën për të plotësuar axhendën tënde. Përpiqu të shohësh situatën nga këndvështrimi i tjetrit. Ndoshta baristi është nën presion ose miku yt po kalon një ditë të keqe. Kjo empati ndihmon të mos e marrësh gjithçka personalisht.
Ngadalëso fillo me trupin
Kur ndihesh i nxituar, trupi dhe mendja kalojnë në gjendje “emergjence”. Merr frymë thellë, ec më ngadalë, fol me qetësi. Kjo aktivizon sistemin nervor të qetësimit dhe të ndihmon të reagosh me mendje të kthjellët, jo me impuls.
Lëviz për të çliruar tensionin
Padurimi është energji që grumbullohet në trup. Bërtitjet, grindjet apo mesazhet e zemëruara janë simptoma të saj.
Zgjidhja? Aktivitet fizik: ecje, një top stresi, një dush i ftohtë, edhe një frymëmarrje e thellë. Këto veprime të thjeshta shkarkojnë tensionin dhe rikthejnë balancën emocionale.
Mëso të rri rehat me “asgjënë”
Durimi lidhet ngushtë me tolerimin e boshllëkut. Jeta moderne na nxit të jemi gjithmonë në lëvizje. Por kur truri mësohet me qetësinë, fillon të kuptojë se nuk ka asnjë emergjencë.
Fik telefonin për 10 minuta. Rri pa orar pas drekës së së dielës. Bëje këtë një zakon. Sepse sa më shumë të jesh rehat me pritjen, aq më pak kontroll ka ajo mbi ty.
Durimi nuk do të thotë të mos ndjesh acarim, por të mësosh si të mos e ushqesh atë. Ai është një muskul emocional që ndërtohet me vetëdije, ngadalë, me ushtrime të vogla, çdo ditë. Dhe po, ti mund ta ndërtosh.