Pas debatit të sontëm(e enjte) në emisionin “Debat Plus” në RTV Dukagjini, ku u ngritën shqetësime rreth lidhjeve mes anëtarëve të Bordit të KOSTT-it dhe zyrtarëve të lartë të Qeverisë së Kosovës, përfshirë zëvendëskryeministra, ministra dhe figura të Lëvizjes Vetëvendosje, ka reaguar vetë Operatori i Sistemit, Transmisionit dhe Tregut – KOSTT.
Në një komunikatë për media, KOSTT-i ka ‘sqaruar’ se çështja e lëshimit të Garancisë së Pagesës për Prodhuesin e Privilegjuar të projektit solar 100 MW është interpretuar gabimisht.
Ata theksojnë se kjo garanci është një kërkesë standarde në kuadër të Marrëveshjes së Blerjes së Energjisë (PPA), dhe se ende nuk është lëshuar.
“Kjo garanci u kërkua si rezultat i paqëndrueshmërisë financiare të KOSTT gjatë periudhës së ankandit për projektin 100 MW, për të garantuar se KOSTT do të përmbushë detyrimet si blerës i energjisë elektrike nga impianti fotovoltaik,” thuhet në komunikatë.
Sipas KOSTT-it, garancia do të lëshohet vetëm pas përfundimit të fazës së komisionimit dhe arritjes së Datës së Operimit Komercial të projektit.
KOSTT në komunikatë thekson se pretendimet e bëra në emisionin televiziv Debat Plus janë “të pasakta, të paqëndrueshme dhe shtrembërojnë të vërtetën”.
Tutje në komunikatë thuhet se KOSTT rithekson angazhimin e tij për të mbështetur zhvillimin e energjisë së pastër dhe përmbushjen e objektivave strategjike të Republikës së Kosovës për burimet e ripërtëritshme.
Në emisionin Debat Plus sonte është shpërfaqur në mënyrë ekskluzive lidhja familjare e politike mes zëvendëskryeministrave, ministrave e zyrtarëve të LVV-së. Po ashtu, janë publikuar edhe dokumente, marrëveshje e emaila të rëndësishëm ku shpërfaqet skandali energjetik në vend.