Përveç KF Bashkimi, me një njoftim pas ndeshjes me Kozhufin, ku Bashkimi me gol në minutën e 94-të shënoi fitore prej 1-2, ka dal edhe vet drejtuesi I klubit, Burak Hida.
Ai ka deklaruar se me përgjegjësi të plotë KF Bashkimi 1947 asnjëherë nuk ka tentuar të blejë apo të ndërhyjë në asnjë mënyrë në ndonjë ndeshje futbolli.
Numri një i Bashkimit ka thënë poashtu se si klub me histori, janë të gatshëm të përgjigjen për çdo dyshim apo akuzë, nëse ekziston ndonjë fakt që vërteton përfshirjen e tyre në ndonjë shkelje.
Por ka theksuar qartë se janë kundër çdo lloj manipulimi apo marrëzie që dëmton sportin dhe nuk do të lejojnë që emri i klubit të tyre të dëmtohet padrejtësisht.
Ja postimi i tij pa ndërhyrje:
Deklaratë nga KF Bashkimi 1947
Në emër të kryesisë së klubit tonë, në emrin tim personal si drejtues, dhe në emër të qytetit tonë të nderuar, duam të deklarojmë qartë dhe me përgjegjësi të plotë se KF Bashkimi 1947 asnjëherë nuk ka tentuar të blejë apo të ndërhyjë në asnjë mënyrë në ndonjë ndeshje futbolli.
Sporti është vlerë e lartë në qytetin tonë dhe ne e trajtojmë me dinjitet dhe ndershmëri. Me respekt të madh ndaj Federatës së Futbollit të Maqedonisë së Veriut, theksojmë se gjatë këtij sezoni – edhe pse kemi pasur disa gabime në fushën tonë – kemi qenë të kënaqur me referimet dhe kemi besuar në lojë të drejtë (fair-play).
Gjithashtu, me respekt maksimal ndaj Ministrisë së Sportit, duam të dëshmojmë se KF Bashkimi është klub i pastër, që ka luftuar çdo ndeshje deri në minutën e fundit. Edhe në Gjevgjeli, luftuam për 95 minuta për të shënuar, por siç dihet, futbolli fitohet me gola.
Ne, si klub me histori, jemi të gatshëm të përgjigjemi për çdo dyshim apo akuzë, nëse ekziston ndonjë fakt që vërteton përfshirjen tonë në ndonjë shkelje. Por theksojmë qartë: ne jemi kundër çdo lloj manipulimi apo marrëzie që dëmton sportin dhe nuk do të lejojmë që emri i klubit tonë dhe një klub tjetër historik të dëmtohen padrejtësisht.
Me respekt,
Kryesia e KF Bashkimi 1947
Burak Hida – Drejtues i klubit