Digjitalizimi i Ministrisë së Mjedisit Jetësor dhe Planifikimit Hapësinor synon të rrisë efikasitetin e sistemit, të kufizojë ndikimin e faktorit njerëzor dhe të luftojë lidhjet e ndikimet e jashtme në vendimmarrje. Përmes përdorimit të të dhënave, transparencës digjitale dhe proceseve të automatizuara, synohet të luftohet krimi mjedisor dhe neglizhenca institucionale.
Të dhënat do të jenë të qasshme për të gjithë qytetarët, ndërsa digjitalizimi shihet si një mekanizëm për rritjen e llogaridhënies dhe kontrollit publik.
“Digjitalizimi është mjet politik për drejtësi”, deklaroi ministri i Mjedisit Jetësor, Muamet Hoxha, i cili gjatë një konference për media në Qeveri prezantoi pesë modulet e digjitalizimit në fushën e mjedisit.
Sipas ministrit, modulet do të shpjegohen më hollësisht për publikun gjatë periudhës së ardhshme.
Pesë modulet e kthesës së gjelbër digjitale
Moduli 1: Themelet – kthesa e gjelbër përmes digjitalizimit
Ky modul përfshin një platformë digjitale ku qytetarët do të mund të shohin të gjitha projektet që zbaton Ministria e Mjedisit Jetësor dhe Planifikimit Hapësinor.
Moduli 2: Bërthama – kthesa e gjelbër përmes digjitalizimit
Ky projekt parasheh digjitalizimin e brendshëm të ministrisë, përfshirë arkivin dhe sistemin e informacionit hapësinor.
Digjitalizimi i arkivit po realizohet në bashkëpunim me Ministrinë e Transformimit Digjital, me synimin për të zëvendësuar dokumentacionin në letër me arkivimin digjital. Sistemi i ri do të mundësojë gjurmë digjitale dhe krijimin e kushteve për ekspertizë forenzike digjitale.
Moduli 3: Koha – kthesa e gjelbër përmes digjitalizimit
Në kuadër të Agjendës së Reformave të Qeverisë, parashihet thjeshtimi i 100 hapave administrativë në procedurat që lidhen me ministrinë. Prej tyre, 15 hapa janë planifikuar të përfundojnë në fazën e parë, deri në fund të këtij viti.
Ministri Hoxha pret që gjatë muajve të ardhshëm të ketë përparim të plotë në zhvillimin e këtij projekti.
Moduli 4: Toka – kthesa e gjelbër përmes digjitalizimit
Ky modul parasheh krijimin e një platforme digjitale për evidentimin dhe hartëzimin e deponive të egra në të gjitha komunat.
Gjithashtu, është duke u zbatuar një projekt pilot për mbikëqyrjen me kamera të deponive ilegale, i cili aktualisht po testohet në disa komuna.
Moduli 5: Ajri – kthesa e gjelbër përmes digjitalizimit
Moduli i pestë përfshin krijimin e një regjistri digjital ku të gjithë operatorët që posedojnë leje ekologjike të integruar të kategorisë A do të regjistrojnë emetimet e tyre, në përputhje me kriteret dhe kushtet e përcaktuara në lejet përkatëse.
Përmes këtyre masave, ministria synon të rrisë transparencën, të përmirësojë kontrollin mbi ndotjen dhe të forcojë përgjegjësinë institucionale në mbrojtjen e mjedisit.